ლატვიელმა მეცნიერებმა ინოვაციური მოწყობილობა შექმნეს, რომელსაც კანის კიბოს ადრეული სტადიის გამოვლენა რამდენიმე წამში შეუძლია. მოწყობილობა ოჯახის ექიმებმა პრაქტიკაში უკვე გამოცადეს და მისი ეფექტიანობა დაადასტურეს. ლატვია ამ მოწყობილობის პროტოტიპის და ბიზნეს იდეის მსოფლიო სამეწარმეო თასზე გაგზავნას აპირებს, რომლის საპრიზო ფონდი 1.3 მილიონი ევროა.
კასპარს ეიდუკსი, Bdetect-ის ბიზნესის განვითარების მენეჯერი, ამბობს, რომ მოწყობილობა ლატვიის უნივერსიტეტში (LU) შეიქმნა. სწორედ უნივერსიტეტის მკვლევარები არიან ინოვაციის პიონერები. ყველაფერი ასე დაიწყო: ერთ-ერთმა მკვლვევარმა სადოქტორო ნაშრომისთვის შეიმუშავა ბიოფოტონიკის ტექნოლოგია, რომელიც კანის სხვადასხვა კომპონენტის მიერ სინათლის ტალღების განსხვავებულად არეკვლას აკვირდება. სინათლის ამრეკლავი თვისებების კომბინაციით შესაძლებელია იმის გარკვევა, არის თუ არა კანის კონკრეტული სტრუქტურა კიბოს რისკის ქვეშ.
„მას შემდეგ თითქმის ათი წელი გავიდა. ახლა ეს ცოდნა პრაქტიკაში გადავიტანეთ და მუშა პროტოტიპი შევქმენით“, — განაცხადა ეიდუკსმა. მან დასძინა, რომ კომპანიაც შექმნეს და მოწყობილობის სერტიფიცირებისთვის და ბაზარზე გასატანად ინვესტორებს აქტიურად ეძებენ.
მოწყობილობა ოჯახის ექიმებმა პრაქტიკაში უკვე გამოცადეს. ცდების დროს მან მელანომის გამოვლენის ეფექტიანობა დაამტკიცა.
ეიდუკსმა განმარტა, თუ როგორ მუშაობს მოწყობილობა: „ვიღებთ ფენის მსგავს მოწყობილობას, ვადებთ კანზე. სკანირება რამდენიმე წამს გრძელდება და ანალიზიც დასრულებულია. შემდეგ ხსნი ტელეფონს, კომპიუტერს, ნებისმიერ მოწყობილობას რომელიც ინტერნეტს უკავშირდება, შედიხარ შენს პროფილში და შედეგებს იქ ხედავ.“
კასპარს ეიდუკსი მსოფლიო სამეწარმეო თასზე ლატვიას წარმოადგენს. კონკურსის ეროვნული ფინალი სწორედ მან მოიგო.
იანის კროპსმა, Swedbank-ის წარმომადგენელმა, განმარტა: „საპრიზო ფონდი, რა თქმა უნდა, მიმზიდველია. თუმცა, ის სხვადასხვა ჯგუფებად იყოფა. ჯერ მსოფლიო ფინალამდე უნდა მივაღწიოთ. ჩვეულებრივ, მსოფლიო სამეწარმეო თასისკენ გზა ლატვიაში განაცხადის შეტანით იწყება, შემდეგ უნდა მოიგო ეროვნული ფინალი, მერე გლობალური აქსელერატორის 200 საუკეთესო კომპანიების სიაში უნდა შეხვიდე. ამის შემდეგ მთავარი პრიზისთვის მებრძოლთა 100 საუკეთესოს შორის უნდა მოხვდე.”
მსოფლიო სამეწარმეო თასის ფინალი ნოემბერში, რიადში, საუდის არაბეთში გაიმართება. ლატვიურ კომპანიებს ამ თასზე მონაწილეობა წარსულშიც აქვთ მიღებული.
კროპსის თქმით, ლატვიური კომპანიები 100 საუკეთესოს შორისაც და ფინალშიც მოხვდნენ. „ჩემთვის ყველაზე საინტერესო ისაა, რომ ეს კომპანიები სახლში ბრუნდებიან და ამბობენ: მთავარი სარგებელი არა მთავარი პრიზის მოგება, არამედ ისაა, რომ პროცესში უამრავ სხვა მეწარმეს ხვდები მთელი მსოფლიოდან. იწყებ გლობალურ გაფართოებას და ხვდები, რამდენად კონკურენტუნარიანია შენი იდეა. ხშირად, პატარა ბაზარზე ყოფნისას, გიჩნდება კითხვა, ვის შეიძლება მოუნდეს ჩემი პროდუქტი. შემდეგ, გადიხარ საზღვრებს გარეთ გარეთ და აღმოჩნდება, რომ გლობალური გიგანტი ხარ“, — აღნიშნა მან.
მსოფლიო სამეწარმეო თასის გლობალურ ფინალში მოსამზადებლად კომპანიის წარმომადგენლები ამჟამად საერთაშორისო მენტორებთან ერთად ონლაინ ტრენინგებში მონაწილეობენ.