სამშაბათს დილით, ვილნიუსის აეროპორტში ფრენები დროებით მას შემდეგ შეჩერდა, რაც საჰაერო მოძრაობის მაკონტროლებლებმა მფრინავი ობიექტის დაფიქსირების შესახებ მიიღეს შეტყობინება. ეს განაცხადება ლიეტუვის კრიზისების მართვის ეროვნულმა ცენტრმა გაავრცელა.
განცხადებაში ნათქვამია, რომ ფრენების შეჩერება უსაფრთხოების სტანდარტული პროცედურების შესაბამისად, სიფრთხილის მიზნით მოხდა.
„ლიეტუვის სამხედრო-საჰაერო ძალების რადარი აკვირდებოდა ამოუცნობ ობიექტს, რომელიც ბელარუსიდან ლიეტუვის მიმართულებით მოძრაობდა. სიგნალი ასევე დროებით დააფიქსირეს სახმელეთო თავდაცვის ნაწილებმა, თუმცა ვიზუალური კონტაქტი არ დამყარებულა,“ – განაცხადეს ცენტრში.
ობიექტის გასანეიტრალებლად, ნატო-ს საჰაერო პატრულირების მისიის ფარგლებში მოქმედი გამანადგურებლები აამოქმედეს, თუმცა რადარის მიერ მითითებულ ადგილზე მისვლისას, მათ ვერაფერი აღმოაჩინეს.
ცენტრის ცნობით, ინციდენტი გამოძიებული იქნება, თუმცა წინასწარი შეფასებით, ეს, შესაძლოა, „მეტეოროლოგიური მოვლენა“ ყოფილიყო.
ცენტრის ინფორმაციით, დაახლოებით 09:00 საათზე ყველა ფრენა განახლდა და აეროპორტის ოპერაციებსა და ფრენებზე ზემოქმედება „მინიმალური“ იყო.
მგზავრებს ურჩიეს, ფრენის დროის შესახებ განახლებული ინფორმაციის მისაღებად, პირდაპირ ავიაკომპანიებს დაუკავშირდნენ.
გასულ კვირას ვილნიუსის აეროპორტში ფრენები ასევე შეაფერხა კომპანია Teltonika-ს მიერ გამოყენებულმა დრონმა. მან დაახლოებით ნახევარი საათით შეაყოვნა პრეზიდენტ გიტანას ნაუსედას თვითმფრინავის დაშვება, რომელიც ფინეთიდან ბრუნდებოდა.
ტრანსპორტისა და კომუნიკაციების სამინისტროში აცხადებენ, რომ მსგავსი ინციდენტების თავიდან ასაცილებლად, ამჟამად უპილოტო საფრენი აპარატების არასაფრენი ზონების გაფართოების საკითხს განიხილავენ.
ზაფხულში ლიეტუვის ტერიტორიაზე ორი რუსული „გერბერას“ ტიპის დრონი შეფრინდა, რომელთაგან ერთ-ერთს რამდენიმე კილოგრამი ასაფეთქებელი ნივთიერება გადაჰქონდა. მათ ნავიგაცია არ შეუფერხებიათ, მაგრამ საზოგადოების ყურადღება დრონებისგან მომდინარე საფრთხეებზე მიაპყრეს.