იმ დღეს, როდესაც სებასტიან ლეკორნუმ საფრანგეთის მთავრობის მეთაურის თანამდებობა დაიკავა, ქვეყნის სხვადასხვა ქალაქის ქუჩებში ათასობით ადამიანი გავიდა. პროტესტის ზოგიერთი მონაწილის თქმით, საფრანგეთის პრეზიდენტის გადაწყვეტილება მათთვის „სილის გაწვნა“ იყო. პარიზში პოლიციამ 145-ზე მეტი ადამიანის იდენტიფიცირება მოახდინა და 34 პირი დააკავა. ასეთია საფრანგეთში ოთხშაბათს გამართული აქციების მოკლე შეფასება.
ჩვენ ცვლილებები გვჭირდება“ – ეს იყო ერთ-ერთი ყველაზე ხშირად გაჟღერებული სლოგანი ოთხშაბათს, 10 სექტემბერს გამართულ საპროტესტო აქციებზე, რომელიც, ძირითადად, მემარცხენე მოძრაობამ „დავბლოკოთ ყველაფერი“ („Bloquear Tudo“) დაგეგმა.
პარიზში პოლიციამ „ათასობით ადამიანს“ ხელი შეუშალა, „გარ დიუ ნორდის“ სადგურზე შეჭრილიყო. France24-ის ცნობით, ხელისუფლება იძულებული გახდა, საქმეში ჩარეულიყო, რათა „დიდ ჯგუფს“ სარკინიგზო სადგურში შესვლის საშუალება არ მისცემოდა.
როგორც „ასოშიეითიდ პრესი“ იუწყება, მანამდე, პიკის საათის დროს, მომიტინგეთა სხვა ჯგუფები პარიზის ერთ-ერთი მთავარი გზის გადაკეტვას ცდილობდნენ.
მათ ბარიკადები აღმართეს და პოლიციელებს სხვადასხვა საგნებს ესროდნენ.
„ფრანს პრესი“ წერს, რომ მთავარი გზის გადაკეტვის უფლება 200 დემონსტრანტს პოლიციამ არც ქვეყნის სამხრეთში, ქალაქ მარსელში მისცა.
ქვეყნის შინაგან საქმეთა მინისტრის, ბრუნო რიტეილომ ამ დილით ჟურნალისტებს განუცხადა, რომ დაახლოებით 50-მა ნიღბიანმა პირმა ბლოკირების მოწყობა ბორდოშიც სცადა.
ამასთან, საფრანგეთის სამხრეთ-დასავლეთით, ტულუზაში გაჩენილმა ხანძარმა, რომელიც სწრაფად ჩააქრეს, ტულუზასა და ოშს (Auch) შორის მოძრაობა შეაფერხა.
საავტომობილო გზების კონცესიონერ „ვინჩის“ ინფორმაციით, პროტესტი და მოძრაობის შეფერხება მთელი ქვეყნის მასშტაბით დაფიქსირდა, მათ შორის – მონპელიეში, ნანტსა და ლიონში.
მთელი საფრანგეთის მასშტაბით, უსაფრთხოების ძალების 80 000 თანამშრომელი იყო მობილიზებული.
ახალმა პრემიერ-მინისტრმა, სებასტიან ლეკორნუმ თანამდებობა უკვე დაიკავა, ქვეყანაში კი საპროტესტო გამოსვლები გრძელდება.
მთავრობის ახალმა ხელმძღვანელმა X პლატფორმაზე პირობა დადო, რომ მისი კაბინეტი, „ქვეყნის ერთიანობის მიზნით, პოლიტიკური და ინსტიტუციური სტაბილურობისთვის“ იმუშავებს.
მოძრაობა „დავბლოკოთ ყველაფრი“-ს მხარდამჭერთა მოთხოვნებში შედის უარის თქმა ბაირუს იდეაზე, რომელიც ორი ყოველწლიური სახალხო დღესასწაულის გაუქმებას, ასევე თანამშრომლებისთვის სამედიცინო ხარჯების შემცირებას და ამის ნაცვლად, ავადმყოფობის ბიულეტენის უფრო ხელსაყრელი პირობებით ანაზღაურების შემოღებას ითვალისწინებს.
მაკრონმა ლეკორნუ პრემიერ-მინისტრად სამშაბათს, პარლამენტში ნდობის გამოცხადების კენჭისყრაში მისი წინამორბედის, ფრანსუა ბაირუს დამარცხებიდან ერთი დღის შემდეგ დანიშნა.
ანალიტიკოსების აზრით, ლეკორნუ არის ფრთხილი, მაგრამ მაღალკვალიფიციური პოლიტიკოსი, რომელსაც, მაკრონისგან განსხვავებით, პრეზიდენტობის ამბიცია არ გააჩნია.
ლეკორნუ მეშვიდე პრემიერ-მინისტრი გახდა მას შემდეგ, რაც მაკრონმა 2017 წელს პრეზიდენტის თანამდებობა დაიკავა, მეხუთე პრემიერი – 2022 წელს მისი მეორე საპრეზიდენტო ვადის დაწყებიდან და მესამე – ბოლო ერთი წლის განმავლობაში.
ოთხშაბათის საპროტესტო აქციების სრული მასშტაბის შეფასება რთული იყო მასში პროფკავშირების მინიმალური ჩართულობის გამო, რომელთა (პროფკავშირული ორგანიზაციების) უმეტესობა 18 სექტემბერს ფართომასშტაბიან გაფიცვებისა და საპროტესტო გამოსვლების ორგანიზებას თავად აპირებს.
https://www.rtp.pt/noticias/politica/protestos-em-franca-recebem-novo-primeiro-ministro_n1682616