ოპტიმიზაციის შედეგად 700 მილიონი არის უკვე დაზოგილი. ეს არის პირველი ეტაპი იმ დავალების, რაც პრემიერისგან მივიღეთ და შემიძლია უკვე თამამად ვთქვა, რომ მეორე ეტაპის ოპტიმიზაციაზე გადავდივართ, – განაცხადა „იმედის დილის“ რუბრიკა „ბიზნეს ინსაიდერში“ ეკონომიკის განვითარების მინისტრმა მარიამ ქვრივიშვილმა, მთავრობის მიერ სახელმწიფო საწარმოებში წელს დაწყებული ოპტიმიზაციის საკითხზე საუბრისას.
მისი თქმით, დაზოგილი თანხები სწორი მიმართულებით, სწორი ხედვით გადანაწილდება უფრო მეტი ეფექტურობისთვის და უფრო სწორი პროექტების და პროგრამების განხორციელებისთვის.
„ეკონომიკის სამინისტროში გვაქვს ძალიან აქტიური მუშაობა უშუალოდ ოპტიმიზაციის კუთხით ყველა საწარმოში, ყველა სსიპ-ში, ყველა შპს-ში მიდის სრულად გადახედვა ყველა პროექტების მათ შორის შესყიდვების, ისევე, როგორც საკადრო პოლიტიკის. ეს არის პირველი ეტაპი იმ დავალების, რაც ჩვენ პრემიერისგან მივიღეთ. აღნიშნული ოპტიმიზაციის შედეგად 700 მილიონი არის უკვე ხელშესახებად დაზოგილი. რისგან შედგება ეს 700 მილიონი?!- პირველ რიგში ეს არის საკმაოდ დიდი ნაწილი უშუალოდ მიმდინარე პროექტების შესყიდვების ღირებულების შემცირების და ეს არ მოხდა პროექტების შეჩერების ხარჯზე. ჩვენ ვნახეთ, რომ იყო საკმაოდ დიდი რესურსი გარკვეულ პროექტებში იმისთვის, რომ იგივე სერვისი იგივე ხარისხით მიგვეღო და იგივე პროდუქტი მიგვეღო თუმცა ბიუჯეტის დაზოგვის ხარჯზე. მეორეს მხრივ, ეს იყო რელევანტური პროექტების დიფერენციაცია არარელევანტური პროექტებისგან, იქნებოდა დროში, სივრცეში თუ ა.შ. და მესამე, რა თქმა უნდა საკადრო პოლიტიკა იმისთვის, რომ ჩვენ უზრუნველვყოთ, რომ გვყავდეს კიდევ უფრო მეტი ეფექტური თანამშრომელი მაგრამ ეს რა თქმა უნდა მეორეს მხრივ, ჩვენ ვუყურებთ იმას, რომ ეფექტური თანამშრომლების მიღმა თუ გვქონდა ისეთივე მიმართულება, სადაც ოპტიმიზაცია იყო საჭირო. ჩვენ ეს გზა პირველ ეტაპზე უკვე შევასრულეთ და დღეს, შემიძლია უკვე თამამად ვთქვა, რომ მეორე ეტაპის ოპტიმიზაციაზე გადავდივართ.
როგორ წარვმართავთ ამ 700 მილიონს?! ეს ძირითადად ეხებოდა რკინიგზას, ისევე, როგორც ენერგეტიკის სექტორს. ორი განსაკუთრებით მნიშვნელოვანი მიმართულებაა. გვაქვს უამრავი გამოწვევა ამ მიმართულებით და შესაბამისად, ჩვენს ახალ გუნდთან ერთად, ასევე ძალიან ბევრი საკადრო ცვლილებაც გვქონდა სამინისტროში უზრუნველვყოფთ იმას, რომ სწორი მიმართულებით, სწორი ხედვით აღნიშნული თანხები მიემართოს უფრო მეტი ეფექტურობისთვის და უფრო სწორი პროექტების, ისევე, როგორც პროგრამების განხორციელებაში, რაც პირველ რიგში უზრუნველყოფს სექტორების გაძლიერებას, მაგრამ ამავდროულად უზრუნველყოფს უშუალოდ კერძო სექტორის მხარდაჭერას იმისთვის, რომ ეფექტურად სახელმწიფომ და კერძო სექტორმა განაგრძოს აღნიშნული სექტორების განვითარებას“, – განაცხადა მარიამ ქვრივიშვილმა.