რიგაში, სეიმის (პარლამენტის) შენობის წინ, დაიწყო მოძრაობა „ცხოველთა თავისუფლების“ მიერ ორგანიზებული აქცია სახელწოდებით, „ერთი კვირა გალიაში“. როგორც ლატვიის საზოგადოებრივი მედიამაუწყებლი (LSM+) იუწყება, კამპანიის მიზანია, დაარწმუნოს დეპუტატები, რომ კვერცხმდებელი ქათმების გალიებში გამოკეტვა უნდა აიკრძალოს. საპროტესტო ღონისძიების ფარგლებში, მისმა 11-მა მონაწილემ დადგა დიდი ვოლიერი, რომელიც მეფრინველეობის ფერმის გალიას წააგავს.
25 სექტემბრამდე აქციის მონაწილეები – სულ დაახლოებით ასი ადამიანი – იქ 24 საათის განმავლობაში მორიგეობით იქნებიან. მოძრაობის ხელმძღვანელის, კატრინა კრიგერეს თქმით, ასეთი აქციები უკვე რვა წელია იმართება. ამ ხნის განმავლობაში გალიებში გამოკეტილი კვერცხმდებელი ქათმების რაოდენობა 98%-დან 63%-მდე შემცირდა. მან ხაზგასმით აღნიშნა, რომ მხოლოდ გალიაში გამოკეტვის სრული გაუქმება იხსნის ფრინველებს ტანჯვისგან. ინიციატივას მხარს უჭერენ მსხვილი სავაჭრო ქსელები, მწარმოებლები და სასტუმრო ინდუსტრია. გარდა ამისა, 30 ათასზე მეტმა ადამიანმა მოაწერა ხელი პეტიციას, „გაათავისუფლეთ ქათმები“.
გასულ კვირას ლატვიის პარლამენტმა „ცხოველთა დაცვის შესახებ“ კანონში შესატანი ცვლილებები კომისიას გადასცა განსახილველად. დოკუმენტი ითვალისწინებს კვერცხმდებელი ქათმების გალიებში გამოკეტვის აკრძალვას 2030 წლიდან. ცვლილებების მხარდამჭერები აღნიშნავენ, რომ გალიები ქათმებს ბუნებრივი ცხოვრების საშუალებას არ აძლევს, თუმცა, თავის მხრივ, აგრობიზნესის წარმომადგენლები საზოგადოებას ფასების შესაძლო ზრდისა და იმ ზიანის შესახებ აფრთხილებენ, რომელიც ეკონომიკას შეიძლება საკანონმდებლო ცვლილებებმა მიაყენოს.