აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე იმერეთის რეგიონში მცხოვრებ აფხაზეთიდან დევნილ მოსახლეობასთან შეხვედრებს აგრძელებს. ინფორმაციას აფხაზეთის მთავრობა ავრცელებს.
მორიგი შეხვედრის ფარგლებში, აფხაზეთის მთავრობის თავმჯდომარე, ადგილობრივი ხელისუფლების წარმომადგენლებთან ერთად წყალტუბოში იმყოფებოდა, სადაც დევნილთა კომპაქტურ ჩასახლებაში არსებულ მდგომარეობასა და პრობლემებს გაეცნო.
შეხვედრაზე გიორგი ჯინჭარაძემ ისაუბრა ადგილობრივ ხელისუფლებასთან კოორდინირებული მუშაობის მნიშვნელობაზე, რაც შესაძლებლობას იძლევა დროულად მოხდეს დევნილთა საჭიროებების იდენტიფიცირება და შესაბამისი რეაგირება.
„ვაგრძელებთ შეხვედრებს კომპაქტურ ჩასახლებებში მცხოვრებ დევნილებთან. თითოეულ ოჯახთან საუბარი გვაძლევს საშუალებას უკეთ გავიგოთ მათი საჭიროებები და საერთო ძალებით ვეძებოთ გამოსავალი.
ასევე, ადგილობრივი ხელისუფლების მხარდაჭერით ვაიდენტიფიცირებთ იმ პრობლემებსა და გამოწვევებს რაც კომპაქტურ ჩასახლებაში აქვთ, რათა ეტაპობრივად მოვახდინოთ ყველა არსებული საჭიროების უზრუნველყოფა“, – განაცხადა გიორგი ჯინჭარაძემ.
აფხაზეთის მთავრობა აქტიურად განაგრძობს მუშაობას დევნილთა საცხოვრებელი პირობების გაუმჯობესებისა და სოციალური მხარდაჭერის მიმართულებით.