დუბლირება წარმოუდგენელია ამომრჩეველთა სიაში და იმთავითვე წარმოუდგენელია იმ ბრალდებების რეალობაში არსებობა, რომელიც გასული წლიდან მოყოლებული გვესმის, – ამის შესახებ ცესკო-ს თავმჯდომარემ, გიორგი კალანდარიშვილმა საქართველოს პირველი არხის გადაცემაში „აქტუალური თემა – მაკა ცინცაძესთან ერთად“ განაცხადა.
„ერთ-ერთი საჯარო პერსონა საუბრობდა, თითქოს მას ჰქონდა ინფორმაცია, რომ ერთმა ამომრჩეველმა შვიდჯერ მიიღო მონაწილეობა, ერთ-ერთი არასამთავრობო ორგანიზაციის წარმომადგენელი ამბობდა, თითქოს ასჯერ ჰქონდა. შეიძლება, შვიდჯერ და ასჯერ ვერ დაამტკიცო, თუმცა, თუ ამბობ ამას, უნდა დაამტკიცო კიდეც. შეიძლება, ვერ დაამტკიცო, მაგრამ ორჯერ და სამჯერ რომ იყო, ეს ხომ მაინც უნდა თქვა, ხომ? დღეს ამერიკული კომპანიის მიერ გამოქვეყნებული დასკვნა კიდევ ერთხელ ხაზს უსვამს იმას, რომ ეს ბრალდებები მათ შორის, იყო აბსოლუტურად უსაფუძვლო“, – განაცხადა კალანდარიშვილმა.
მისი თქმით, ამას ემატება ის, რომ შეიძლება, 13 წევრიდან 11 წევრი არის კომისიაში, თუმცა პარტიის მიერ დანიშნული კომისიის წევრებიც არიან, მაგრამ გასული არჩევნების შედეგებიდან თუ ვიმსჯელებთ, იყო კომისიის 17 წევრი, საიდანაც ცხრა იყო პოლიტიკური პარტიების მიერ დანიშნული, ერთი მმართველი პარტიის მიერ და რვა სხვადასხვა ოპოზიციური პარტიისგან, რაც თავის მხრივ ნიშნავს იმას, რომ თუ რამე ირღვეოდა და ერთი ადამიანი ორჯერ და სამჯერ მოდიოდა, ისმის კითხვა, რას აკეთებდნენ ის ადამიანები.
„მაშინ, რატომ ხუჭავდნენ ისინი თვალს? კარგი, ვთქვათ, ამ შეთქმულებაშიც გავყვეთ, რომ ვიღაც ვიღაცასთან გარიგდა, მაგრამ ერთთან, ორთან, კომისიის ყველა წევრთან გარიგდი, დამკვირვებელთან გარიგდი, მედიასთან გარიგდი, საერთაშორისოსთან გარიგდი და ყველასთან გარიგდი? ამ ყველაფრით ხომ რაღაც აბსურდის თეატრში შევდივართ? აქედან გამომდინარე, ეს ყველაფერი იმედია, მისცემს საზოგადოებას ობიექტური და ჭეშმარიტი დასკვნის გაკეთების შესაძლებლობას იმის თაობაზე, რომ სიებთან დაკავშირებით გავრცელებული ბრალდებები იყო აბსოლუტურად უსაფუძვლო“, – განაცხადა კალანდარიშვილმა.
როგორც კალანდარიშვილმა აღნიშნა, რა თქმა უნდა, ცესკო საუბრობს იმაზე, რა გაკეთდა, რათა პროცესი გაუმჯობესებულიყო, განვითარებულიყო და ა.შ., მაგრამ ეს არ უნდა გავიგოთ ისე, რომ არ ყოფილა, ან მომავალში არ უნდა ველოდოთ რაღაც ხარვეზებს და გადაცდომებს.
„რა თქმა უნდა, ეს არის ძალიან დიდი პროცესი, ათი ათასობით ადამიანი ახორციელებს მის ადმინისტრირებას, ძალიან დიდი არის ადამიანური ფაქტორი და ბუნებრივია, ხარვეზი იქნება, მაგრამ მთავარია, ხარვეზი, გადაცდომა არ იყოს ისეთი, რომელსაც გავლენის მოხდენა შეუძლია შედეგებზე, მთელ პროცესზე და ასე შემდეგ“, – განაცხადა კალანდარიშვილმა.