ჩვენ ყველას გპირდებოდით, რომ დიდი უპირატესობით მოვიგებდით, თუმცა ასეთი ხმამაღალი დაპირებაც მგონი გადაჭარბებით შევასრულეთ, – განაცხადა საქართველოს პრემიერ-მინისტრმა ირაკლი კობახიძემ პარტიის ოფისში მხარდამჭერებთან შეხვედრაზე.
მისივე თქმით, „ქართული ოცნების” სწორედ ასეთი დამაჯერებელი გამარჯვება სჭირდება იმას, რომ ქვეყანა განვითარდეს შეუქცევადად, სტაბილურად.
„გილოცავთ! ყველას მინდა მოგილოცოთ და მადლობა გადაგიხადოთ. რა თქმა უნდა, რომ არა ჩვენი ერთად დგომა, ასეთი შთამბეჭდავი გამარჯვება ვერ შედგებოდა. რა თქმა უნდა, ჩვენ ყველას გპირდებოდით, რომ დიდი უპირატესობით მოვიგებდით, თუმცა ასეთი ხმამაღალი დაპირებაც მგონი გადაჭარბებით შევასრულეთ და ეს ძალიან კარგია, იმიტომ, რომ ჩვენი ზუსტად ასეთი დამაჯერებელი გამარჯვება სჭირდება იმას, რომ ქვეყანა განვითარდეს შეუქცევადად, სტაბილურად“,- აღნიშნა კობახიძემ.
მან თვითმმართველობის არჩევნებში გამარჯვება მიულოცა „ქართული ოცნების” ყველა კანდიდატს.
„ყველა კანდიდატს მინდა მივულოცო, პირველ რიგში, მინდა მივულოცო ჩვენს მთავარ კანდიდატს ადგილობრივი თვითმმართველობის არჩევნებში კახა კალაძეს, რომელმაც უკვე მესამედ მოიპოვა ძალიან შთამბეჭდავი გამარჯვება და ეს ყველაფერი უკვე არის იმ უამრავი საქმის დამსახურება, რაც კახა კალაძეს აქვს გაკეთებული.
ასევე, მინდა მერობის თითოეულ კანდიდატს, უკვე არჩეულ მერს მივულოცო არჩევა და დარწმუნებული ვარ, რომ მათი ხელმძღვანელობით თითოეული მუნიციპალიტეტი ძალიან წინ წავა და განვითარდება ძალიან სწრაფი ტემპებით. ასევე, მინდა მივულოცო საკრებულოს თითოეულ წევრს“,- განაცხადა კობახიძემ.
პრემიერის თქმით, დღევანდელი გამარჯვებაც, ისევე, როგორც ქვეყანაში არსებული მშვიდობა, წინსვლა და განვითარება ბიძინა ივანიშვილის დამსახურებაა.
„განსაკუთრებით მადლობა მინდა გადავუხადო ჩვენი შტაბის წევრებს, ხელმძღვანელობას, ადგილობრივი შტაბების ხელმძღვანელებს. დაუღალავი შრომის შედეგიც არის ყველაფერთან ერთად ის, რა შედეგიც დადგა. რაც მთავარია, მადლობა ყველაფრისთვის ბატონ ბიძინა ივანიშვილს იმიტომ, რომ რაც გვაქვს დღეს ქვეყანას – მშვიდობა, წინსვლა, განვითარება, ეს ყველაფერი ბიძინა ივანიშვილის დამსახურებაა და დღევანდელი გამარჯვებაც რა თქმა უნდა არის ბატონი ბიძინა ივანიშვილის გამარჯვება და მადლობა კიდევ ერთხელ მას ყველაფრისთვის“, – აღნიშნა მთავრობის მეთაურმა.