უცხოური ძალა, რომელიც საქართველოს და ხელისუფლებას ებრძვის, 4 ოქტომბრის შემდეგ დაფიქრდება და, სულ მცირე, გარკვეულ მოლაპარაკებებს დაიწყებს ან რაღაც ფორმატს შეცვლის, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.
მისი თქმით, არჩევნების დღეს ელჩები დუმდნენ, რადგან კარგად იცოდნენ, რომ რევოლუცია და დამხობა უცხოური ძალების მიერ იყო დაფინანსებული.
„ვეღარც კარგი კომენტარი გააკეთეს და ვეღარც – ცუდი. ელჩი რომ არ გამოვა და ასეთ ცეცხლწაკიდებულ, ღობედანგრეულ პრეზიდენტის სასახლესთან კომენტარს არ გააკეთებს, ნიშნავს, რომ ეს სწორედ მათი მხრიდანაა დაფინანსებული. ვფიქრობ, მათი მხრიდან გარკვეული გადატვირთვები უნდა დაიწყოს, რადგან ქართველი ხალხის მყარი პოზიცია დაინახეს. „ნაცმოძრაობის“ და მათი ფილიალის წარმომადგენლებმა აღიარეს და თქვეს, იმდენი ხალხი არ მოვიდა, რომ ხელისუფლებას უკან დაეხიაო. იცით, რატომ არ მივიდა? – საქართველოში, შეიძლება, ხელისუფლებას პოლიტიკას უჭერდე მხარს ან არა, მაგრამ ხალხს რევოლუცია არ უნდა. არჩევნებზე მივა და ხმას მისცემს იმას, ვინც უნდა, რომ ხელისუფლებაში იყოს“, – განაცხადა მაჭარაშვილმა.