„ბაჩო ახალაიას ბინძური წარსულიდან გამომდინარე არსებობს საფუძვლიანი ეჭვი, რომ ეს ჩანაწერი ავთენტიკური იყოს,“- ამის შესახებ პარლამენტის ფრაქცია “ქართული ოცნების” თავმჯდომარის პირველმა მოადგილემ ლევან მაჭავარიანმა განაცხადა.
მისივე თქმით, ახალაია და მისი მეუღლე საუბრობენ იმაზე, რომ თითქოს აქცია მშვიდობიანი იყო, რა თქმა უნდა, ამით კიდევ უფრო მეტ კითხვის ნიშანს აჩენენ.
“ჩვენ დამთხვევების არ გვჯერა, რამდენიმე დღით ადრე ასაფეთქებელი ნივთიერებები შემოვიდა საქართველოში, რაზეც გამოძიება მიმდინარეობს, ასევე, იმ დღეს იქნა ამოღებული ძალიან დიდი რაოდენობით საბრძოლო მასალა, იარაღები მცხეთაში და ესეც, ვფიქრობთ, რომ დამთხვევა არ არის, თუმცა ამასაც გამოძიებამ უნდა უპასუხოს. ბატონი ახალაიას ჩანაწერი, რისი გადამოწმებაც ხორციელდება, ავთენტიკურია თუ არა, თუმცა არსებობს საფუძვლიანი ეჭვი მისი ბინძური წარსულიდან გამომდინარე, რომ ეს ჩანაწერი ავთენტიკური იყოს, თუმცა აქაც, რა თქმა უნდა, გამოძიების პასუხებს უნდა დაველოდოთ. ეს ყველაფერი ერთობლიობაში ძალიან უცნაურად ემთხვეოდა ერთმანეთს, ასეთი დამთხვევები ფიზიკურად არ არსებობს და ახლა, როდესაც ბატონი ახალაია და მისი მეუღლე საუბრობენ იმაზე, რომ თითქოს ეს ყველაფერი მშვიდობიანი იყო, რა თქმა უნდა, ამით კიდევ უფრო მეტ კითხვის ნიშანს აჩენენ”, – აცხადებს მაჭავარიანი.
ცნობისთვის, ტელეკომპანია „იმედმა“ გაავრცელა აუდიოჩანაწერი, რომლის მიხედვითაც, თბილისში არეულობების დაგეგმვაზე სავარაუდოდ პაატა ბურჭულაძე და ბაჩო ახალაია საუბრობენ.