მოუწოდეს, გააფრთხილეს, მაგრამ კანონზე ფეხი ათობით დემონსტრანტს მაინც “დაუცდა” – ასე დაიწყო ვერშემდგარი რევოლუციის მონაწილეების მხრიდან თავის მართლების გრძელი დღეები.
შეკრებილმა ჯარმა დაპირებული ხელისუფლების დამხობა ვერ შეძლო, ახლა კი ამ ჯარის შემკრები თავის ფსიქიკურ პრობლემებზე საუბრობს. ნანა სანდერის მსგავსად, სასჯელისგან თავის არიდება სხვადასხვა ავადმყოფობით სხვებსაც სურთ – სია გრძელია.
თავისი დაცვის ქვეშ მყოფების ფსიქიკურ პრობლემებზე მიუთითებენ ევა შაშიაშვილისა და ბექა მაჭავარიანის ადვოკატები. ორივე მათგანი ძალადობრივი აქციის მონაწილეა. უფლებადამცველის ინფორმაციით, მძიმედ არის ავად 63 წლის ალექსანდრე გოგოლაძე. ადვოკატი ამბობს, რომ ის ონკოპაციენტია. აღკვეთ ღონისძიებად გირაოს შეფარდებასა და ციხიდან გათავისუფლებას ითხოვს კონსტანტინე კოკაიას უფლებადამცველიც, მოტივად კი გულზე გაკეთებულ ოპერაციას ასახელებს. ჩატარებულ ქირურგიულ პროცედურაზე აპელირებს ამირან დოლიშვილის ადვოკატიც.
სახელმწიფო ბრალდებამ არაერთხელ მოუწოდა დაცვის მხარეს, რომ, არსებობის შემთხვევაში, დაკავებულების ჯანმრთელობის მძიმე მდგომარეობის დამადასტურებელი დოკუმენტები წარმოედგინათ.
დოკუმენტაცია პროკურატურას გადასცა და სწორედ ჯანმრთელობის მდგომარეობის გამო გირაოს გადახდის სანაცვლოდ გათავისუფლდა ძალადობრივი აქციის ერთ-ერთი მონაწილე, ია დარახველიძე. 4 ოქტომბერს ის სპეცრაზმელებს არაერთხელ დაუპირისპირდა. იგივე ქმედებისკენ მოუწოდებდა სხვა დემონსტრანტებსაც.
ისინი კი, ვინც ჯანმრთელობის მდგომარეობის შესახებ დოკუმენტაციას ვერ წარადგენენ, საკუთარი სოციალური მდგომარეობით სპეკულირებენ. ადვოკატები თავისი დაცვის ქვეშ მყოფების ოჯახებზეც საუბრობენ და ამ გზით ცდილობენ, ძალადობრივ აქციაში მონაწილე პირების აღმკვეთი ღონისძიების გარეშე დატოვებას.
სანამ კანონს დაარღვევდნენ და გისოსებს მიღმა აღმოჩნდებოდნენ, აქციის მონაწილეებს ხელისუფლება რამდენიმე კვირით ადრე, სამართლის დაცვისკენ მოუწოდებდა. ყველა დემონსტრანტი არაერთხელ გააფრთხილეს, რომ სახელმწიფო ნებისმიერ ძალადობას კანონიერ პასუხს გასცემდა.
ყველა კანონდარღვევაზე კანონისმიერი პასუხის გაცემას სახელმწიფო განაგრძობს – ბოლო დღეების განმავლობაში ჩატარებული სპეცოპერაციების შედეგად, სამართალდამცველებმა ძალადობრივ აქციაში მონაწილე 46 პირი დააკავეს. მათ შორის არიან აქციის ორგანიზატორებიც. გამოძიება სახელმწიფო ხელისუფლების დამხობისკენ მოწოდების, ჯგუფური ძალადობის ორგანიზებისა და მასში მონაწილეობის, სტრატეგიული ობიექტის ხელში ჩაგდების მცდელობისა და სხვისი ნივთის დაზიანების მუხლებით მიმდინარეობს. ბრალდებულთა ნაწილი დანაშაულს არ აღიარებს, ნაწილი კი დუმილის უფლებას იყენებს.