იმედი მაქვს, რომ ანტიკორუფციული ბიურო დაინტერესდება ამ საკითხით, თუმცა საქართველო პატარაა და ინფორმაციები არ იმალება, – განაცხადა საქართველოს პარლამენტის თავმჯდომარემ შალვა პაპუაშვილმა გადაცემა „იმედის კვირის“ მიერ გაშიფრულ არასამთავრობო ორგანიზაციების დაფინანსების სქემაზე საუბრისას.
მისივე თქმით, არის მცდელობა გვერდი აუარონ საქართველოს კანონმდებლობას და დაფინანსება მიაწოდონ მოძალადეებს.
პაპუაშვილის განმარტებით, თუკი ამაში ჩართულია ევროკავშირის ბიუჯეტის გამტარი სხვადასხვა ინსტიტუცია, ეს კატასტროფაა.
„ამ ენჯეოებმა და მათმა დამფინანსებლებმა საკუთარი ქცევით ევროკავშირის დროშა უკვე აქციეს ძალადობის სიმბოლოდ საქართველოში. იქ, სადაც ეს ჯგუფები ჩნდებიან ევროკავშირის დროშით, მოდის ძალადობა და სირცხვილია, რომ მათი დაქირავებული ორგანიზაციებით და საკუთარი წაყრუებით, ევროკავშირის დროშა აქციეს ძალადობის სიმბოლოდ საქართველოში.
რომ არის მცდელობები გვერდი აუარონ საქართველოს კანონმდებლობას, ვიტყოდი, რომ ეს ვენის კონვენციის დარღვევაა, მაგრამ ვხედავთ, რომ არავის ადარდებს. არის „ძალა აღმართს ხნავს“ პრინციპი. მეორე მსოფლიო ომის შემდეგ 80 წელი გვიმტკიცებდნენ, რომ არსებობს საერთაშორისო წესებზე დაფუძნებული წესრიგი, ეს ყველაფერი სინამდვილეში არის ფარსი, მოქმედებს ძალის პრინციპი და უნდათ, რომ ძალით აღმართი ახნან“, – აღნიშნა პაპუაშვილმა.
პარლამენტის თავმჯდომარის თქმით, მნიშვნელოვანია, რომ ანტიკორუფციული ბიურო თუ სხვა სტრუქტურები დაინტერესდნენ ამ საკითხით.
„ესეც აჩვენებს იმ კრიმინალურ ენერგიას, რომელიც ზოგიერთ დონორს აქვს იმისთვის, რომ დააზიანოს სხვა ქვეყანა, კანონის დარღვევაზე არიან წამსვლელები. ეს არის გამეორება, რაც ამხილა ამერიკის ახალმა ადმინისტრაციამ USAID-თან და სხვა ასეთ ფონდებთან დაკავშირებით. მას შემდეგ რაც USAID-ი და მსგავსი ორგანიზაციები ჩაიხსნა მთლიანად გადმოერთო ევროპულ ორგანიზაციებზე და ვხედავთ ზუსტად იმავე ცივსისხლიან, უემოციო დამოკიდებულებას, ყველაფერზე წამსვლელები არიან, ქვეყანაში დამხობასაც კი მხარს უჭერდნენ. დღემდე არავის დაუგმია საქართველოს პრეზიდენტის სასახლეზე ძალადობრივი შტურმი, რადგან ამას იწონებენ და ახალისებენ“, – განმარტა შალვა პაპუაშვილმა.
„იმედის კვირამ“ დიდი ფულის მოძრაობის სქემა გაშიფრა – როგორ შემოდის საქართველოში და ვისზე ნაწილდება ქართული „ფარას“ გვერდის ავლით მილიონობით ლარი.