„იმედის კვირის“ ექსკლუზიურ ინფორმაციას, რომელიც ქართული „ფარას“ გვერდის ავლით არასამთავრობოთა დაფინანსების მორიგ სქემას ეხება, „ხალხის ძალის“ აღმასრულებელი მდივანი გურამ მაჭარაშვილი გამოეხმაურა.
მისი შეფასებით, კიდევ ერთხელ გამოჩნდა, რომ არასამთავრობო სექტორის უდიდესი ნაწილი, ქართულ ინტერესებს არ ემსახურება.
„ეს არის მტკიცებულება იმის, რომ ენჯეო სექტორის აბსოლუტური უმრავლესობა არ ემსახურება ქართულ ინტერესებს. კანონმდებლობის გვერდის ავლით ერიცხებათ თანხები, რა თქმა უნდა, სწორედ რადიკალური აქციებისთვის“, – აღნიშნა მაჭარაშვილმა.
„იმედის კვირის“ ექსკლუზივის თანახმად, ორგანიზაცია „ჯისიარტმა“ ევროკომისიისგან 3 მილიონამდე ლარი მიიღო. გრანტის დანიშნულების მიხედვით, თანხა მსხვერპლთა ტანჯვის შემსუბუქებას უნდა მოხმარდეს. კანონში არსებული გამონაკლისით, ამ შემთხვევაში, ორგანიზაციას რეესტრში რეგისტრირება აღარ ევალება. მიღებული თანხა 11 ორგანიზაციაზე განაწილდა, რომლებიც საპროტესტო აქციების დაფინანსებასა და ჯარიმების გადახდაში აქტიურად მონაწილეობენ. თანხა კონკრეტულმა უფლებადამცველებმაც მიიღეს.