საპროცედურო საკითხთა საპარლამენტო კომიტეტის თავმჯდომარე დავით მათიკაშვილი რუსთაველის გამზირზე გუშინ განვითარებულ პროცესებს ეხმაურება. იგი აცხადებს, რომ ყველა სამართალდამრღვევი სათანადოდ აგებს პასუხს.
„ბუნებრივია, რომ კანონი თავის სიტყვას იტყვის და ამბობს კიდეც. ადმინისტრაციული დაკავებები განმეორებით შემთხვევაში გადაიზრდება სისხლის სამართლის პატიმრობაში. ეს თუ უღირთ იმ სრულიად აფსურდული მოცემულობისთვის, რომ 20-30-მა ან თუნდაც, 100-მა კაცმა გადაკეტოს დედაქალაქის მთავარი არტერია, ეს მათზეა დამოკიდებულია და რა თქმა უნდა, ყველა სამართალდამრღვევი სათანადოდ აგებს პასუხს”, – განაცხადა დავით მათიკაშვილმა.
შსს-ს ინფორმაციით, 22 ოქტომბერს ადმინისტრაციული წესით დაკავებულია აქციის 20-მდე მონაწილე, ვინც უშუალოდ მონაწილეობდა გზის უკანონოდ გადაკეტვის მცდელობაში.