მოსკოვი აცხადებს, რომ ამ იარაღს ნებისმიერი თავდაცვითი ფარის გარღვევა შეუძლია. ამ ფონზე, კიევსა და მოსკოვზე დრონებით განხორციელებულ ახალ თავდასხმებს კვლავ სიკვდილი და ნგრევა მოჰყვა.
რუსეთმა წარმატებით გამოსცადა ბირთვული ძრავის მქონე ფრთოსანი რაკეტა „ბურევესტნიკი“ – ახალი იარაღი, მოსკოვის მტკიცებით, ნებისმიერ თავდაცვით ფარს გაარღვევს. „კრემლი ამ იარაღის განსათავსებლად ნაბიჯებს გადადგამს“, – განაცხადა პრეზიდენტმა ვლადიმერ პუტინმა. ამ ფონზე, კიევზე რუსული დრონებით ღამით განხორციელებული თავდასხმის შედეგად, სამი ადამიანი დაიღუპა და ათობით დაიჭრა, რუსეთის არმიამ კი მოსკოვის მიმართულებით გაშვებული დრონი ჩამოაგდო.
დამკვირვებლები აცხადებენ, რომ „ბურევესტნიკის“ გამოცდა, გასულ კვირას გამართულ ბირთვულ წვრთნებთან ერთად, წარმოადგენს მოსკოვის გზავნილს, რომ რუსეთი, პუტინის სიტყვებით რომ ვთქვათ, დასავლეთის ზეწოლას არასდროს დაემორჩილება. 21 ოქტომბერს ჩატარებული გამოცდის დროს, რაკეტამ 14 000 კმ იფრინა და ჰაერში დაახლოებით 15 საათი დაჰყო.
ვლადიმირ პუტინი, რუსეთის პრეზიდენტი: „ეს უნიკალური პროდუქტია, რომლის მსგავსი მსოფლიოში არ არსებობს. კიდევ ბევრი სამუშაოა გასაწევი ამ იარაღის საბრძოლო მზადყოფნაში მოსაყვანად. თუმცა, რამდენადაც მესმის, ძირითადი ამოცანები უკვე შესრულებულია“.
კრემლში განაცხადეს, რომ პუტინისა და ტრამპის შეხვედრის გაუქმებაზე საუბარი არასწორია და იქვე დასძინეს, რომ მოლაპარაკებებისთვის მზადება აუცილებელია. „ეს რთული პროცესია“, – აღნიშნა პრეს-სპიკერმა, დიმიტრი პესკოვმა.
კირილ დმიტრიევი, პუტინის სპეციალური წარმომადგენელი ინვესტიციებისა და ეკონომიკური თანამშრომლობის საკითხებში: „უკვე მესამე დღეა, რაც შეერთებულ შტატებში ვიმყოფებით და აშშ-ის ადმინისტრაციის წარმომადგენლებთან მოლაპარაკებებს ვაწარმოებთ. ჩვენ მკაფიოდ ვაჟღერებთ პრეზიდენტ პუტინის პოზიციას, რომ მხოლოდ კონსტრუქციული და პატივისცემაზე დაფუძნებული დიალოგი გამოიღებს ნაყოფს და რუსეთზე ზეწოლის ნებისმიერი მცდელობა, უბრალოდ, საღ აზრს მოკლებულია. ჩვენ ვხედავთ ტიტანურ მცდელობებს, ჩაშალონ ნებისმიერი დიალოგი რუსეთსა და შეერთებულ შტატებს შორის და დეზინფორმაცია გაავრცელონ“.
დმიტრიევი ვაშინგტონს „ბურევესტნიკის“ ტესტირების შესახებ ინფორმაციასაც მიაწვდის.