“ბევრჯერ დადასტურდა რომ ეს ბინძური პროპაგანდა იყო”

ფრაქცია „ქართული ოცნების“ თავმჯდომარის პირველი მოადგილე, ლევან მაჭავარიანი სანქციების საკითხებში ევროკავშირის სპეციალური წარმომადგენლის წერილს გამოეხმაურა, რომელშიც დევიდ ო’სალივანი საქართველოს მთავრობას მადლობას უხდის „უმაღლეს დონეზე გამოხატული ერთგულებისთვის და უკვე გადადგმული ნაბიჯებისთვის, რათა არ მოხდეს ევროკავშირის მიერ რუსეთის მიმართ დაწესებული სანქციების გვერდის ავლა“.

„ოთხივე რადიკალური პარტია (კოლექტიური ნაცმოძრაობა) და მდიდარი ენჯეოები ეწეოდნენ ჩვენი ქვეყნის გაშავების კამპანიას, თითქოს საქართველო „შავი ხვრელია“ რუსეთისთვის სანქციების თავის არიდების კუთხით. უკვე ბევრჯერ დადასტურდა, რომ ესეც „რუსული კანონის“ მსგავსი ბინძური პროპაგანდა იყო”, – წერს ლევან მაჭავარიანი.

ევროკავშირის სანქციების შესახებ ევროკომისიის ფინანსური სტაბილურობის, ფინანსური სერვისებისა და კაპიტალის ბაზრების კავშირის გენერალური დირექტორატის წერილში, რომელსაც ხელს აწერს დევიდ ო’სალივანი, ასევე ხაზგასმულია საქართველოს ხელისუფლების მუდმივი ხელმისაწვდომობა სანქციების გვერდის ავლასთან დაკავშირებული საკითხების განსახილველად.