პორტუგალიის საზოგადოებრივი უსაფრთხოების პოლიცია (PSP) აცხადებს, რომ გაავნებელყო ნარკოტიკებით მოვაჭრეთა ქსელი, რომელიც კომპიუტერული აპლიკაციებისა და ყალბი კურიერების გამოყენებით მოქმედებდა.
ოპერაცია ლისაბონში 11 ნოემბერს ჩატარდა. საზოგადოებრივი უსაფრთხოების პოლიციის ლისაბონის საქალაქო განყოფილების ხელმძღვანელობის განცხადებით, მათ სამიზნეს წარმოადგენდა ნარკომოვაჭრეთა ქსელი, რომელიც თავის საქმიანობაში კომპიუტერულ აპლიკაციებსა და სადისტრიბუციო პლატფორმების ყალბ კურიერებს იყენებდა.
რამდენიმეთვიანი გამოძიების შემდეგ, ხუთი მამაკაცი და 36 წლამდე ასაკის ერთი ქალია დაკავებული.
„ბრალდებულებს ამ სფეროში „ღრმა ცოდნა“ გააჩნდათ. მათ შეიმუშავეს აპლიკაციები, რომლებიც სხვადასხვა სახის ნარკოტიკის გაყიდვაში ეხმარებოდა – წინასწარ განსაზღვრავდა მიწოდების ადგილს და გადახდის ციფრულ ფორმებს, აგრეთვე ხელს უწყობდა პოლიციის თვალთახედვის არეალიდან დისტანცირებას“, – ნათქვამია საზოგადოებრივი უსაფრთხოების პოლიციის ლისაბონის საქალაქო განყოფილების („კომეტილისი“) განცხადებაში.
უწყების ცნობით, ნარკოამანათებს არიგებდა ადამიანთა ჯგუფი, რომლის წევრები თავს მიტანის პლატფორმების კურიერებად ასაღებდნენ.
ამ ოპერაციის დროს, ლისაბონში ჩატარდა შვიდი სახლის ჩხრეკა და ამოიღეს ჰაშიშის 8 944 ინდივიდუალური დოზა, კოკაინის 5 490 დოზა და მეთილენდიოქსიმეტამფეტამინის (MDMA) 4 460 დოზა. სამართალდამცველებმა ასევე იპოვეს 307 გრამი ჰალუცინოგენური სოკო, 1.5 კილოგრამი ქიმიური ნარევები და 1 540 ევრო ნაღდი ფული.
ოთხ ბრალდებულს პატიმრობა შეეფარდა. დანარჩენ ორს დაეკისრა ვალდებულება, რეგულარულად გამოცხადდეს პოლიციაში.