ესტონეთის თავდაცვის სამინისტროს სამხედრო მზადყოფნის დეპარტამენტის ხელმძღვანელი, გერტ კაიუ მიიჩნევს, რომ უკრაინის ქალაქები, პოკროვსკი და მირნოგრადი, დიდწილად, რუსეთის შეიარაღებული ძალების პირდაპირი ან არაპირდაპირი კონტროლის ქვეშაა და ორივე, სავარაუდოდ, დეკემბერში, დაეცემა.
ესტონეთის თავდაცვის ძალების დაზვერვის ცენტრი უკრაინაში არსებული სიტუაციის შესახებ ინფორმაციას ყოველკვირეულად ავრცელებს. ამას, როგორც წესი, ცენტრის ხელმძღვანელი, პოლკოვნიკი ანტს კივისელგი აკეთებს, თუმცა ამჯერად ის გერტ კაიუმ შეცვალა.
„ფრონტზე შეტევის მთავარ ღერძად დონეცკის ოლქი და ქალაქ პოკროვსკის მიმდებარე ტერიტორია რჩება. როგორც პოკროვსკი, ისე ქალაქი მირნოგრადი რუსეთის შეიარაღებული ძალების პირდაპირი ან არაპირდაპირი კონტროლის ქვეშაა. ამიტომ, სავარაუდოა, რომ დეკემბერში ორივე დასახლებული პუნქტი რუსეთის კონტროლის ქვეშ მოექცევა“, – განაცხადა კაიუმ ესტონეთის თავდაცვის სამინისტროში გამართულ ყოველკვირეულ პრესკონფერენციაზე.
„მიუხედავად იმ ფაქტისა, რომ ეს ქალაქები, დიდწილად, რუსეთის შეიარაღებული ძალების კონტროლის ქვეშაა, მათი დაცემის შესახებ არანაირი დაზუსტებული ინფორმაცია ჯერ არ არსებობს“, – აღნიშნა მან.
რუსებმა გარკვეულ წარმატებას მიაღწიეს ზაპოროჟიეს ოლქში, პოკროვსკიდან სამხრეთ-დასავლეთით, დაახლოებით 100 კილომეტრში. ამიტომ, ამ რეგიონზე ზეწოლა კვლავ ძალიან მაღალია.
„გარდა ამისა, რუსეთმა კვლავ გაააქტიურა ფართომასშტაბიანი თავდასხმები სხვადასხვა ტიპის საჰაერო შეიარაღების, მათ შორის დრონების, ბალისტიკური რაკეტებისა და ფრთოსანი რაკეტების გამოყენებით უკრაინის მშვიდობიანი მოსახლეობისა და კრიტიკული ინფრასტრუქტურის წინააღმდეგ მთელი ქვეყნის მასშტაბით“, – განაცხადა ესტონეთის თავდაცვის სამინისტროს ოფიციალურმა წარმომადგენელმა.
„რუსები, დრონების გარდა, კვლავ იყენებენ პლანირებად ბომბებს. მათ შორის განსხვავება ის არის, რომ ეს უკანასკნელი, ძირითადად, უკრაინის ფრონტის ხაზისა და ზურგის ქვედანაყოფებზე თავდასხმისთვის გამოიყენება. ასე რომ, აქ ძალიან მკაფიო განსხვავებაა: დრონები, ბალისტიკური რაკეტები და ფრთოსანი რაკეტები სამოქალაქო ინფრასტრუქტურისა და მშვიდობიანი მოსახლეობის წინააღმდეგ გამოიყენება, ხოლო პლანირებადი ბომბები – ძირითადად სამხედრო ნაწილების წინააღმდეგ“, – განმარტა კაიუმ.
ფრონტის ხაზის საერთო სურათის შეფასებისას, მან აღნიშნა, რომ რუსების წინსვლა არც ისე სწრაფი და საგრძნობია.
„მიუხედავად ამისა, ისინი ტერიტორიებს ნაწილ-ნაწილ მაინც იკავებენ. ამ მცირე წარმატებების მისაღწევად, ისინი უკრაინის ფრონტის ხაზის მომარაგების გზებზე ახორციელებენ თავდასხმებს, რის გამოც საბრძოლო დანაყოფები ცუდად ან არარეგულარულად მარაგდებიან. შედეგად, მებრძოლთა მორალური სულისკვეთება და მათი ბრძოლისუნარიანობა ეცემა. სწორედ ამ გზით ცდილობს რუსული მხარე უპირატესობის მოპოვებას“, – ამბობს კაიუ.
მან ასევე აღნიშნა, რომ, პარალელურად, უკრაინა აგრძელებს თავდასხმებს რუსეთის ტერიტორიაზე.
„თუ ადრე რუსეთის ტერიტორიაზე თავდასხმები ფრონტის ხაზიდან დაახლოებით 160 კილომეტრის დაშორებით ხდებოდა, 17 ნოემბერს უკრაინამ გამოიყენა ATACMS-ის რაკეტები რუსეთში, ვორონეჟის დასახლების მიმდებარე ტერიტორიაზე დასარტყმელად. ეს ადგილი ფრონტის ხაზიდან დაახლოებით 250 კილომეტრით არის დაშორებული. უკრაინას აქამდე რაკეტებით რუსეთის ტერიტორიაზე ასეთი მანძილიდან არ დაურტყამს, რაც კიდევ ერთხელ აჩვენებს უკრაინის გარკვეულ შესაძლებლობას, მტრის წინააღმდეგ უფრო ღრმა დარტყმები განახორციელოს“, – განაცხადა ყოველკვირეულ პრესკონფერენციაზე ესტონეთის თავდაცვის უწყების ოფიციალურმა პირმა.
კაიუმ ასევე თქვა, რომ უკრაინა დარტყმებს, ძირითადად, რუსეთის სხვადასხვა ნავთობგადამამუშავებელ ობიექტზე, ელექტროსადგურებსა და სხვადასხვა ტიპის ადრეული გაფრთხილებისა და საჰაერო თავდაცვის სისტემებზე ახორციელებს. „ამ უკანასკნელ შემთხვევაში, მოიაზრება თავდასხმებს S-400 სისტემებზე, ასევე ყირიმში განლაგებულ შორი მოქმედების სხვადასხვა რადარულ სისტემებზე“.
„შეჯამების სახით შეგვიძლია ვთქვათ, რომ ფრონტზე არსებული საბრძოლო ვითარება საკმაოდ ჰგავს იმას, რაც ბოლო თვეებში იყო. არცერთ მხარეს მნიშვნელოვანი წინსვლისთვის არ მიუღწევია. შენარჩუნებულია ახალი ტერიტორიის დაკავების, შემდეგ მისი კვლავ დაკარგვის და მეორე მხარის მიერ მისი დაკავების ტენდენცია. ასე რომ, ეს არის ტერიტორიის ხელიდან ხელში გადასვლისა და განმეორებითი იერიშების უწყვეტი ციკლი. ეს, გარკვეული დროის განმავლობაში, სავარაუდოდ,ზუსტად ასევე გაგრძელდება,“ – აღნიშნა კაიუმ.
მან ასევე განაცხადა, რომ ბოლო დროს რუსულმა მხარემ ფრონტის ხაზის მიმდებარე ტერიტორიებზე დაახლოებით სამი საფრენი აპარატი დაკარგა.
„ვგულისხმობ პილოტირებულ საფრენ აპარატებს – ავიაგამანადგურებლებს და ვერტმფრენებს. გარდა ამისა, დაახლოებით ექვსი ვერტმფრენი და გამანადგურებელი, გარე ზემოქმედების გარეშე, სხვადასხვა მიზეზით ჩამოვარდა. ასე რომ, რუსეთის შეიარაღებული ძალებისთვის დანაკარგები, სხვადასხვა მიზეზით, საჰაერო სფეროშიც საგრძნობია, რასაც, საბოლოო ჯამში, ჩვენთვის გარკვეული სარგებელი მოაქვს“.
https://news.err.ee/1609864494/expert-ukraine-s-pokrovsk-and-myrnohrad-will-likely-fall-in-december