გერმანიის საგარეო საქმეთა მინისტრი იოჰან ვადეფული მიიჩნევს, რომ უკრაინას შესაძლოა „მტკივნეულ დათმობებზე“ მოუწიოს წასვლა და ეს პროცესი შესაძლოა რეფერენდუმით დასრულდეს.
მინისტრის თქმით, უკრაინის მოქალაქეებმა უნდა გადაწყვიტონ, შეძლებენ თუ არა ომის დასრულების პირობების მიღებას – საუბარია რუსეთის მოთხოვნაზე, რომელიც მნიშვნელოვან ტერიტორიულ დათმობებს ეხება.
„უდავოდ, ეს უკრაინისთვის უკიდურესად რთული პროცესი იქნება, რომელიც, შესაძლოა, რეფერენდუმით დასრულდეს. დიპლომატიის ამოცანაა, შეიმუშაოს კომპრომისები, რომლებსაც კონფლიქტის მხარეები მხარს დაუჭერენ. საბოლოო ჯამში, ეს ყოველთვის მტანჯველ დათმობებთან იქნება დაკავშირებული“, – აღნიშნა მინისტრმა.
მისივე თქმით, საერთაშორისო დიპლომატიური ძალისხმევის წყალობით, ზავის შანსები „არასდროს ყოფილა უფრო დიდი“, როგორიც ახლაა და უკრაინისთვის უსაფრთხოების გარანტიების მიცემის მნიშვნელობას გაუსვა ხაზი.