რუსეთის პრეზიდენტის, ვლადიმირ პუტინის საუბარი აშშ-ის პრეზიდენტის სპეციალურ წარმომადგენელთან, სტივ უიტკოფთან და მის სიძესთან, ჯარედ კუშნერთან სასარგებლო და კონსტრუქციული იყო, – განაცხადა რუსეთის პრეზიდენტის თანაშემწემ, იური უშაკოვმა.
„საუბარი ძალიან სასარგებლო, კონსტრუქციული და ძალიან შინაარსობრივი იყო“, – განუცხადა მან ჟურნალისტებს.
მისი თქმით, რუსეთი და აშშ შეთანხმდნენ, რომ მოლაპარაკებების არსს არ გაასაჯაროებენ.
„მთავარი, რაც კიდევ ერთხელ მინდა ხაზგასმით აღვნიშნო, არის ის, რომ მხარეებმა გამოაცხადეს მზადყოფნა, გააგრძელონ ერთად მუშაობა უკრაინაში მშვიდობიანი, გრძელვადიანი მოგვარების მისაღწევად“, – განაცხადა რუსეთის პრეზიდენტის თანაშემწემ.
„რაც შეეხება საპრეზიდენტო დონეზე შესაძლო შეხვედრას, ეს დამოკიდებული იქნება იმაზე, თუ რა პროგრესს მივაღწევთ ამ გზაზე, რაზეც ჩვენ დაჟინებით და მონდომებით ვიმუშავებთ ჩვენი თანაშემწეების, საგარეო საქმეთა სამინისტროსა და სხვა უწყებების წარმომადგენლების მეშვეობით“, – აღნიშნა უშაკოვმა.
მისი თქმით, შეხვედრაზე განიხილეს აშშ-ის გეგმის არსი უკრაინაში კონფლიქტის მოგვარების კუთხით და არა კონკრეტული წინადადებები.
„კომპრომისული გეგმა ჯერ არ არსებობს; ზოგიერთი ამერიკული წინადადება რუსეთისთვის მისაღებია, ზოგი კი – არა“, – დასძინა უშაკოვმა.