უნგრეთი უკრაინას იარაღს ან ფულს არ გაუგზავნის, – ამის შესახებ უნგრეთის საგარეო საქმეთა მინისტრმა, პიტერ სიიარტომ განაცხადა.
სიიარტოს თქმით, ვიდრე უნგრეთს ეროვნული მთავრობა ჰყავს, უნგრელი ხალხის ფული უკრაინაში არ გაიგზავნება და შესაბამისად, უნგრეთი არ შეუერთდება იარაღის მიწოდების ნატო-ს ახალ მექანიზმს.
სიიარტომ აღნიშნა, რომ ზოგიერთი წინადადება მოითხოვს, რომ თითოეულმა წევრმა ქვეყანამ თავისი მშპ-ის 0.25 პროცენტი შეიტანოს, უნგრეთისთვის ეს ნიშნავს 200 მილიარდ ფორინტს.
უნგრეთის საგარეო საქმეთა მინისტრმა ხაზგასმით აღნიშნა, რომ ნატო-ს ევროპული მეინსტრიმი, რომელსაც ომი ამოძრავებს, რუსეთთან უფრო მეტ დაპირისპირებასა და უკრაინისთვის მეტ ფულს ითხოვს, მიუხედავად იმისა, რომ იქ ერთ-ერთი უმსხვილესი კორუფციული სკანდალია.
სიიარტოს თქმით, ნატო-ს ევროპელი წევრები ომის ფანატიზმმა მოიცვა, რაც მათ რეალობის აღქმაში ხელს უშლის, მათ შორის, ისინი ამტკიცებენ, თითქოს უკრაინა იცავს ევროპას, რომ მისი თავდაცვის ინდუსტრიაში ინვესტიციები ემსახურება ევროპის უსაფრთხოებას, ან რომ უკრაინა იმარჯვებს ბრძოლის ველზე.
ამასთან, უნგრეთის საგარეო საქმეთა მინისტრმა დაადასტურა უნგრეთის სრული მხარდაჭერა აშშ-ის პრეზიდენტის, დონალდ ტრამპის სამშვიდობო ძალისხმევის მიმართ და ხაზგასმით აღნიშნა, რომ სამშვიდობო გეგმის გარეშე სიტუაცია დღითიდღე გაუარესდება და იმის დაჯერება, რომ უკრაინას შეუძლია ომში გამარჯვება, ილუზიაა.