ევროკავშირის სამიტის შედეგებმა აჩვენა, რომ ევროპას ჯერ კიდევ არ სურს, უკრაინის გადასარჩენად საფასური გადაიხადოს, – ამ სათაურით სტატიას გამოცემა „პოლიტიკო“ აქვეყნებს.
როგორც სტატიაშია აღნიშნული, ევროკავშირის სამიტზე პოლონეთის პრემიერ- მინისტრმა, დონალდ ტუსკმა საკითხი ასე დააყენა – „ფული დღეს ან სისხლისღვრა ხვალ“. ეს ფორმულა გამოხატავს ყველა კონფლიქტს, რომელთა გამკლავებაც ევროკავშირს უკრაინის მხარდაჭერასთან დაკავშირებით უწევს.
„საბოლოოდ რის გაღება შეუძლია ევროკავშირის 27 წევრს უკრაინის და საკუთარი თავის გადასარჩენად? ევროკავშირის სამიტზე პასუხი ასეთი იყო: იდეალურ ვარიანტში, ვინმე სხვისი ფულის. ევროკავშირის ლიდერები ამტკიცებენ, შეთანხმებას მიაღწიეს და მომდევნო ორ წელიწადში უკრაინის ფინანსური დახმარება უზრუნველყოფილი იქნება ერთობლივი სესხით,თუმცა ცხადია, რომ ევროპული ქვეყნების დაყოფილი ბლოკი რამდენიმე თვის განმავლობაში საჯაროდ თუ კონფიდენციალურ საუბრებში დავობდა, თუ ვინ უნდა გადაიხადოს ანგარიში და სავარაუდოდ ეს ჯერ კიდევ არ არის გადაწყვეტილი“, – წერს „პოლიტიკო“.
როგორც გამოცემა აღნიშნავს, ევროკომისიის პრეზიდენტი ურსულა ფონ დერ ლაიენი და გერმანიის კანცლერი ფრიდრიხ მერცი ცდილობდნენ, სხვა ევროპელი ლიდერების დათანხმებას რუსეთის გაყინული აქტივების გამოყენებასთან დაკავშირებით.
„ევროპა საკუთარი თავდაცვისთვის მეორე მსოფლიო ომის შემდგომ აშშ-ის სამხედრო ძალას ეყრდნობოდა. ის ეყრდნობოდა ამერიკულ ფულს უკრაინის თავდაცვისთვის სამი წლის განმავლობაში, 2022 წლის თებერვლიდან. დონალდ ტრამპის თეთრ სახლში დაბრუნებისა და ამერიკული დაფინანსების შეწყვეტის შემდეგ, ევროპელებმა გაზარდეს საკუთარი წვლილი, თუმცა არა საკმარისად, რომ დანაკლისი შეავსონ. ამიტომ, ევროპის ძლიერ მოთამაშეებს მოუწიათ სხვა წყაროების პოვნა უკრაინისთვის ფულის მოსაზიდად. გერმანიის კანცლერმა და ევროკომისიის პრეზიდენტმა იცოდნენ, როგორ სურდათ ნაღდი ფულის მიღება – ბელგიურ ბანკებში შენახული რუსული აქტივების დაყაჩაღებით. ბოლო ორი თვე მათ გაატარეს სხვა ლიდერების დარწმუნებაში, რომ ისინიც შეერთებოდნენ მათ გეგმას მოსკოვის გაყინული აქტივების გამოყენებით უკრაინისთვის უზარმაზარი სესხის მისაღებად. თუმცა, ბელგიის პრემიერ-მინისტრმა ბარტე დე ვევერმა ეს უარყო, შიშოდობა, რომ ამას სამართლებრივი ქმედებები და პუტინის მხრიდან სხვა რეპრესიები მოჰყვებოდა“, – ნათქვამია „პოლიტიკოს“ სტატიაში.
ევროკავშირი ლიდერები ალტერნატიულ გეგმაზე შეთანხმდნენ, რომელსაც გერმანიის კანცლერმა დაუჭირა მხარი. საუბარია ვეროკავშირის ქვეყნების ერთობლივ სესხზე, რომელიც უზრუნველყოფილი იქნება ევროკავშირის გრძელვადიანი ბიუჯეტით.
„საბოლოოდ, რუსეთის აქტივები შეიძლება იყოს გამოყენებული სესხის დასაფარად, თუმცა ეს ჯერ ნათელი არ არის“, – წერს „პოლიტიკო“.
გამოცემა აღნიშნავს, რომ ფონ დერ ლაიენის სურვილის მიუხედავად, უკრაინას საუკეთესო გზით დაეხმაროს, ბევრ ევროპელ ლიდერს, კიდევ არ სჯერა მისი არგუმენტების.
„პოლიტიკო“ იმოწმებს კიელის ინსტიტუტის ბოლო კვლევებს, რომლის მიხედვითაც, 2025 წელს ევროკავშირის მხრიდან დაპირებული დაფინანსების მოცულობა შესაძლოა, ყველაზე მცირე იყოს. 2022 წელს ომის დაწყების შემდეგ ევროპა სავარაუდოდ ვერ შეავსებს აშშ-ის დახმარების შეწყვეტის შედეგად წარმოქმნილ დანაკლისს. ამასთან „პოლიტიკო“ წერს, რომ კიდევ უფრო გაიზარდა სხვადასხვა ევროპის ქვეყნების მიერ კიევის დასახმარებლად გამოყოფილი დაფინანსების რაოდენობებს შორის სხვაობაც.
„მაშინ როდესაც საფრანგეთმა და გერმანიამ, ასევე დიდმა ბრიტანეთმა მნიშვნელოვნად გაზარდეს უკრაინისთვის გაწეული კონტრიბუცია, ჩრდილოეთ ევროპის ქვეყნები, როგროციაა შვედეთი, ნორვეგია და დანია, მაინც მნიშვნელოვნად წინ არიან, მთლიან შიდა პროდუქტზე გათვლით. ამასთან, იტალიის და ესპანეთის წვლილი ძალიან მცირეა. იგივე დინამიკა იყო ევროკავშირის სამიტის წინა დღეებშიც. ევროკავშირის სამხრეთით მდებარე ქვეყნები ბელგიასთან ერთად რეპარაციული სესხის გეგმის წინააღმდეგ გამოდიოდნენ, ხოლო ჩრდილოეთ ევროპის ქვეყნები და გერმანია მის წინ წაწევას ცდილობდნენ. საბოლოო შეთანხმებით, უნგრეთი, ჩეხეთი და სლოვაკეთი უკრაინის დაფინანსებაში წვლილს საერთოდ არ შეიტანენ. 27 წევრისგან შემდგარი ევროკავშირი გადაიქცა 24 წევრის ჯგუფად“, – ნათქვამია სტატიაში.
„პოლიტიკო“ წერს, რომ ევროკავშირის ქვეყნები რუსეთთან შედარებით ეკონომიკურ სუპერ ძალას წარმოადგენენ. ევროკავშირის 27 წევრის საერთო მთლიანი შიდა პროდუქტი 18 ტრილიონი ევროა, მაშინ როდესაც რუსეთის მთლიანი შიდა პროდუქტი 2 ტრილიონი ევრო.
„ნორვეგიისა და დიდი ბრიტანეთის გარეშეც, უკრაინის ევროპელ მოკავშირეებს აქვთ რესურსი პუტინის დასამარცხებლად, თუ ეს რეალურად სურთ“, – წერს „პოლიტიკო“.