ეყოლება თუ არა “ნაციონალურ მოძრაობას” ახალი თავმჯდომარე – არსებული ინფორმაციით, მიხეილ სააკაშვილი, თავმჯდომარის პოსტზე თინა ბოკუჩავას ნაცვლად, ლევან სანიკიძეს განიხილავს და ამ თემაზე კონსულტაციებს გადის. პარტიაში გავრცელებულ ინფორმაციას არ ადასტურებენ და ხაზგასმით ამბობენ იმასაც, რომ გუნდში არანაირი დაპირისპირება არ არის.
მმართველ გუნდში კი აცხადებენ, რომ თავმჯდომარეების შეცვლა სააკაშვილის პარტიას კრიზისიდან ვერ გამოიყვანს.
“პოლიტიკური პარტია, რომლის სამართლებრივი გაუქმება “ქართულ ოცნებას” სასამართლოს გზით აქვს მოთხოვნილი, ხოლო მეორე კუთხით, ეს არის პარტია, რომელმაც თვითგანადგურების რეკორდი დაამყარა, შესაბამისად, არანაირი მნიშვნელობა არ აქვს ვინ იქნება თავმჯდომარე. ერთი ფაქტია, რომ ეს პოლიტიკური გაერთიანება, მავნებლური პოლიტიკური გაერთიანება როგორც მმართველობის, ასევე ოპოზიციაში ყოფნის დროს, დაკავებული იყო ერთადერთი რამით, რომ საკუთარი სამშობლო და სახელმწიფო დაეზიანებინათ”, – აცხადებს პარლამენტის გარემოს დაცვისა და ბუნებრივი რესურსების კომიტეტის თავმჯდომარე მაია ბითაძე.