ოქროს ფასი ისტორიული რეკორდების მოხსნას განაგრძობს. ირკვევა, რომ ბოლო 4 წლის განმავლობაში ოქროს გაძვირებით, რუსეთმა იმ ოდენობის მოგება მიიღო, რომელიც ევროკავშირში მის გაყინულ აქტივებს თითქმის უტოლდება. უკრაინაში ომის დაწყების შემდეგ, ოქროს შესყიდვა ბევრი ქვეყნის ცენტრალურმა ბანკმა დაიწყო; პოლონეთს ამჟამად ევროპის ცენტრალურ ბანკზე მეტი ოქროს მარაგი აქვს.
ეს პროცესი ისტორიის წიაღში დაბრუნება კი არა, არამედ ნამდვილი ახალი „ოქროს ციებ-ცხელებაა“. საუკუნეზე მეტი ხნის შემდეგ, ძვირფასი ლითონის ბრწყინვალება იღბლის მაძიებლებს კვლავ ალასკისკენ ექაჩება.
მიკი კრაუსი, ოქროს მაძიებელი: „დიახ, მე ვპოულობ ოქროს. მაგრამ ჩემამდე ყველაფერი უკვე გადათხარეს. მე, უბრალოდ, მხოლოდ ნარჩენებსღა ვპოულობ“.
ბოლო წლების ფინანსური და გეოპოლიტიკური გაურკვევლობის გამო, „ოქროს ციებ-ცხელებამ“ მთელი ქვეყნები მოიცვა. ოქროს მსოფლიო საბჭოს (World Gold Council) მონაცემებით, ზოგიერთი ქვეყნის ცენტრალურმა ბანკმა, 2022 წლიდან მოყოლებული, თავის რეზერვებს ასობით ტონა ოქრო შემატა.
უკრაინაში ომის დაწყების შემდეგ, რუსეთმა თავისი რეზერვები 900 ათასი ტროას უნციით გაზარდა და ამჟამად თითქმის 75 მილიონ ტროას უნცია ოქროს ფლობს. ამ ძვირფას ლითონზე ფასის მატების შედეგად, რუსეთმა 194 მილიარდი დოლარი გამოიმუშავა, მაშინ როცა ევროკავშირში მისი გაყინული აქტივები 212 მილიარდ დოლარს შეადგენს.
გასულ წელს, მსოფლიოში ოქროს ყველაზე დიდი შემსყიდველი პოლონეთი იყო. ის ახლა 550 მეტრულ ტონა ოქროს ფლობს – თითქმის 50 ტონით მეტს, ვიდრე ევროპის ცენტრალური ბანკი. ვარშავის მიზანია, მინიმუმ, 700 მეტრული ტონა ოქროს დარეზერვება. 2025 წელს ოქროს აქტიური მყიდველი იყო სერბეთიც. თავისი ოქროს აქტივები ასევე გაზარდა ჩეხეთმა. ბოლო წლებში სულ უფრო მეტ ოქროს ინახავენ რეზერვში თურქეთი და ჩინეთი.
ჟაო ჯინჰა, ოქროს გამყიდველი: „ოქროს ფასები რეკორდულად მაღალია. თუ რაღაც მომენტში მისი ფასი ეცემა, შემდეგ ის ისევ იზრდება, რადგან ოქრო ვალუტის ფორმაა და ის მუდამ ინარჩუნებს ღირებულებას“.
ჩინეთი მსოფლიოში ოქროს უდიდესი ბაზარია. ამ ქვეყნის ცენტრალურ ბანკს დაახლოებით 2 300 მეტრული ტონა ოქროს მარაგი გააჩნია. ჩინეთს ასევე აქვს „ოქროს დედაქალაქი“, სადაც ლითონზე მოთხოვნა ტურისტულ ღირსშესანიშნაობად იქცა. ზოგიერთ დღეებში ამ ტერიტორიას 40 000-მდე ვიზიტორი სტუმრობს.
გუო ჯიანვენი, კალიგრაფი: „ხალხს ყოველთვის უყვარდა ოქრო და ამის გამო მასზე მოთხოვნა მუდამ იქნება“.
გასული წლის ბოლოს, ჩინეთში ოქროს ახალი საბადო აღმოაჩინეს, რომელიც მსოფლიოში ერთ-ერთი უდიდესია. ვარაუდობენ, რომ იქ დაახლოებით 1100 მეტრული ტონა ძვირფასი ლითონის მარაგია. 26 იანვარს ჩინეთმა გამოაცხადა, რომ ყიდულობს კანადურ ოქროს მომპოვებელ კომპანიას, რომელიც მსოფლიო ბაზარზე ერთ-ერთი უმსხვილესია. ამ გარიგების გამო, აშშ-ის პრეზიდენტი, დონალდ ტრამპი ოტავას ახალი ტარიფებით დაემუქრა.
https://bntnews.bg/news/treska-za-zlato-%E2%80%93-koi-darzhavi-zabogatyaha-ot-voinite-1376113news.html