ინტერნეტ-გამოცემა „დელფის“ ცნობით, ესტონეთში მიმდინარეობს საკანონმდებლო ცვლილებების განხილვა, რომლის დამტკიცების შემთხვევაში, ოჯახური ძალადობისთვის მსჯავრდებულ პირებს სახელის შეცვლა აეკრძალებათ.
როგორც „დელფის“ ესტონურენოვანი გამოცემა იუწყება, სოციალურ საკითხთა სამინისტრომ თხოვნით მიმართა შინაგან საქმეთა სამინისტროს, განიხილოს „პირადი სახელების შესახებ“ კანონში ცვლილებების შეტანის საკითხი, რათა ოჯახური ძალადობისთვის მსჯავრდებულ პირებს სახელის ლეგალურად შეცვლა აეკრძალოთ.
სამინისტროს განმარტებით, ოჯახური ძალადობისთვის მსჯავრდებულთათვის სახელის შეცვლის უფლების შენარჩუნებამ, შესაძლოა, საფრთხე შეუქმნას მათ მსხვერპლთ, ასევე შეაფერხოს რეციდივის თავიდან აცილების მიზნით გასატარებელი ზომები.
„ოჯახში ძალადობა იშვიათად არის ერთჯერადი ქმედება; ეს არის განმეორებადი და რეგულარული ქცევა“, – აცხადებს ესტონეთის სოციალურ საკითხთა სამინისტრო და იქვე დასძენს, რომ კვლევების თანახმად, ადრე ჩადენილი ძალადობრივი ქცევა მომავალი ძალადობის ძლიერი ინდიკატორია მაშინაც კი, თუ დანაშაულის ხანდაზმულობის ვადა გასულია.
უწყებაში მიიჩნევენ, რომ დანაშაულის ჩადენის შემდეგ სახელის შეცვლამ, შესაძლოა, მოძალადეებს საშუალება მისცეს, წარსულში ჩადენილი დანაშაული დაუმალონ ახალ პარტნიორებს, დამსაქმებლებს ან თუნდაც მთელ საზოგადოებას, რაც ზრდის რისკს ახალ პოტენციურ მსხვერპლთათვის და ართულებს როგორც მსხვერპლთა მიერ თავის დაცვას, ისე სამართალდამცავთა მხრიდან პრევენციული ზომების მიღებას.
სამინისტრომ ასევე ხაზი გაუსვა მსხვერპლთა უსაფრთხოების დაცვის აუცილებლობას და აღნიშნა, რომ დანაშაულის ხანდაზმულობის ვადის გასვლა არ ნიშნავს, რომ მსხვერპლთათვის განსაცდელი დასრულდა ან მასზე განხორციელებული ფსიქოლოგიური ზეგავლენა უკვალოდ გაქრა.
სოციალურ საკითხთა სამინისტრო ასევე აცხადებს, რომ ოჯახური მოძალადეების მიერ იდენტობის შეცვლამ, „შესაძლოა, გამოიწვიოს მსხვერპლთა ხელახალი ტრავმირება, გააჩინოს შიში და გაურკვევლობა, შეამციროს მათი მზაობა, ითხოვონ დახმარება ან განაცხადონ ძალადობის თაობაზე“.
ნაკლებად მკაცრი ზომები არ იმუშავებს
მიმართვაში ხაზგასმულია, რომ შეთავაზებული შეზღუდვა ასევე ხელს შეუწყობს მსჯავრდებულის სასჯელის სოციალური ასპექტის შენარჩუნებას იმ თვალსაზრისით, რომ მათი დანაშაულები, სახელის შეცვლით, მეხსიერებიდან არ წაიშალოს.
აქცენტი კეთდება იმაზეც, რომ საზოგადოებრივი უსაფრთხოებისა და სხვა პირთა უფლებების დაცვა ნაკლებად მკაცრი ზომებით შეუძლებელია.
ესტონეთის საზოგადოებრივი მაუწყებლის ახალი ამბების სამსახური (ERR News) გასულ თვეში ასევე იტყობინებოდა, რომ საკანონმდებლო ცვლილებების მიხედვით, მძიმე დანაშაულისთვის მსჯავრდებულებს სახელის შეცვლა აეკრძალებათ მანამდე, ვიდრე მათი ნასამართლეობა არ გაქარწყლდება.
არასრულწლოვანთა მიმართ ჩადენილი სექსუალური დანაშაულების შემთხვევაში, სახელის შეცვლის აკრძალვა სამუდამოდ იმოქმედებს.
https://news.err.ee/1609925783/estonia-may-ban-domestic-violence-offenders-from-legally-changing-their-name