უკრაინას, აშშ-სა და რუსეთს შორის მოლაპარაკებები უახლოეს მომავალში, სავარაუდოდ, შეერთებულ შტატებში გაგრძელდება, – განაცხადა უკრაინის პრეზიდენტმა, ვოლოდიმირ ზელენსკიმ აბუ-დაბიში გამართული სამმხრივი შეხვედრის მეორე რაუნდის დასრულების შემდეგ.
გუშინ გამართულ მოლაპარაკებებზე მხარეებმა ეკონომიკურ, ტერიტორიულ და ცეცხლის შეწყვეტის საკითხებზე იმსჯელეს.
უკრაინის პრეზიდენტის თქმით, დახურული შეხვედრების დეტალები ამ დრომდე კონფიდენციალურია, თუმცა ის, რომ მომდევნო რაუნდი დაიგეგმა, ნიშნავს, რომ ომის დიალოგის გზით დასრულების შანსი არსებობს.
„ისაუბრეს ყველაფერზე, თუმცა მომლაპარაკებლები ამის შესახებ ინფორმაციას კონფიდენციალურად მიიჩნევენ და მას ადგილზე ჩამოსვლის შემდეგ გამაცნობენ. მნიშვნელოვანია, რომ პროცესი გრძელდება. ჩვენ უფრო სწრაფი შედეგები გვინდა, მაგრამ, რადგანაც შემდეგი შეხვედრა უკვე დაიგეგმა, ნიშნავს, რომ დიალოგის გაგრძელების შანსი არსებობს. იმედი გვაქვს, რომ ის ომის დასრულებამდე მიგვიყვანს“, – განაცხადა ზელენსკიმ საღამოს ტრადიციული ვიდეომიმართვის დროს.