ესტონელმა ევროპარლამენტარმა, რიჰო ტერასმა განაცხადა, რომ უკრაინაში მშვიდობის დამყარებისკენ მიმართული დიპლომატიური ძალისხმევა კუს ნაბიჯებით მიიწევს წინ. ამასთან, გადამდგარი ბრიგადის გენერალი არ მალავს, რომ სამმხრივ მოლაპარაკებებზე ევროკავშირის წარმომადგენლის დანიშვნის იდეას ეწინააღმდეგება.
გასულ კვირას აბუ-დაბიში (არაბთა გაერთიანებული საამიროები) აშშ-ს, რუსეთსა და უკრაინას შორის მოლაპარაკებების ახალი რაუნდი გაიმართა, რათა მოსკოვის სრულმასშტაბიანი შეჭრის დასასრულებლად შეთანხმებისთვის მიეღწიათ. მოლაპარაკებების მონაწილე ყველა მხარემ საჯაროდ განაცხადა, რომ შეხვედრა პროდუქტიული იყო, თუმცა გარღვევა არ მომხდარა.
უკრაინის პრეზიდენტ ვოლოდიმირ ზელენსკის თქმით, ამერიკელებმა მხარეებს მომავალ კვირას მოლაპარაკებების ახალი რაუნდის მაიამიში გამართვა შესთავაზეს, რასაც კიევი დაეთანხმა.
თუმცა, ტერასი, მთლიანობაში, პროგრესის პერსპექტივას ნაკლებად ხედავს.
„სანამ უკრაინა გადაწყვეტილების მიღების თანაბარუფლებიანი მხარე არ გახდება, მშვიდობა ვერ დამყარდება“, – განაცხადა მან კვირას გადაცემა „Ukraina stuudio“-ში გამოსვლისას.
„ზელენსკიმ ან შეიარაღებული ძალების მეთაურმა რომ გადაწყვიტონ ტერიტორიების დათმობა, არ მგონია, იმ ჯარისკაცებმა, რომლებიც აქამდე ფრონტის ხაზს იცავენ, უკან დაიხიონ. მე ვერ ვხედავ მომავალს ისეთ დისკუსიებში, რომლებიც გულისხმობს, რომ უკრაინამ უნდა დათმოს ტერიტორიები, რომელთა დაცვაც შეუძლია“.
გადამდგარი გენერალი ფიქრობს, რომ აშშ-ის პრეზიდენტი დონალდ ტრამპი უკრაინის ომს სხვების თავსატეხ საქმედ მიიჩნევს და მის დაწყებაში თავის წინამორბედებს, ჯო ბაიდენსა და ბარაკ ობამას, ადანაშაულებს. „თუ გამოსავალი არ მოიძებნა, ტრამპი ამაზე დიდად არ ინერვიულებს. მისი ხედვა ასეთია – ეს საკითხი ევროპამ უნდა მოაგვაროს“, – აღნიშნა ტერასმა.
მისი აზრით, შეშფოთების საფუძველს არ იძლევა ის გარემოება, რომ შეერთებულმა შტატებმა და რუსეთმა სამხედრო კონტაქტების აღდგენის შესახებ გააკეთეს განცხადება.
„პირიქით – დადებითი მოვლენაა, როდესაც ამ ორი ქვეყნის მაღალჩინოსან სამხედროებს პირდაპირი კავშირი აქვთ ერთმანეთთან. მსოფლიოში ბევრი ისეთი წერტილია, სადაც ამერიკელი და რუსი ჯარისკაცები შეხებაში არიან. ყველა ასეთ ადგილას დავინახეთ, რომ აშშ-ს დომინირება შეუძლია. მაგალითად, სირიაში, სადაც რუსებს თავისი ადგილი მიუჩინეს“, – აღნიშნა ევროპარლამენტარმა.
„რუსებთან სამხედრო კონტაქტების აღდგენა, სავარაუდოდ, ამერიკელების ინიციატივაა, რათა მოსკოვთან ე.წ „წითელი ხაზი“ შეინარჩუნონ. ეს ცივი ომის დროინდელი მექანიზმია, რომელიც ზოგადად ორივე მხარისთვის სასარგებლოა. ამიტომ, ეს არ შეიძლება, საგანგაშო ნიშნად ჩაითვალოს“, – განმარტა მან.
მეხუთე ბორბალი
ტერასმა მოლაპარაკებებზე ევროპელი წარმომადგენლის მონაწილეობის იდეა უარყო.
„ნამდვილად ვერ ვხედავ აზრს იმაზე მსჯელობაში, შეიძლება თუ არა, რომ რომელიმე ევროპელი მშვიდობის საკითხზე მომლაპარაკებელთა შორის იყოს; ეს ურემზე მეხუთე ბორბლის მიბმას ჰგავს. ძლიერი გზავნილის გარეშე, ვიღაც ევროპელს არავინ მოუსმენს – არც ამერიკელები და არც რუსები“, – განაცხადა ევროპარლამენტარმა.
„თუ ვინმემ მოლაპარაკებებში რეალური მონაწილეობა სურს, მას უნდა ჰქონდეს ძალიან დამაჯერებელი, ძლიერი გზავნილები რუსეთისთვის. მაგალითად, ასეთი – თუ ესა და ეს არ მოხდება, მაშინ ჩვენ გავაკეთებთ იმას, რაც ადრე არ გაგვიკეთებია“, – დასძინა მან.
ტერასმა აღიარა, რომ ევროპას გაყინული რუსული აქტივების კარტის გათამაშება რომ მოეხერხებინა, რუსეთი ბრიუსელის გზავნილებს გაცილებით სერიოზულად მიიღებდა და მაშინ ევროპელებს მოლაპარაკების მაგიდასთან ადგილი ნამდვილად ექნებოდათ.
„ის, რაც ევროპამ უნდა გააკეთოს, კიევისთვის სამხედრო მხარდაჭერის მნიშვნელოვნად გაზრდაა, რათა უკრაინამ გაიმარჯვოს. გამარჯვება ნიშნავს, რომ უკრაინას ვერ აიძულებენ დათანხმდეს პირობებს, რომლი მიხედვითაც მას თავის მიერ კონტროლირებადი ტერიტორიების დათმობა მოუწევს. რა თქმა უნდა, ყირიმის დაბრუნებაზე დღეს არავინ საუბრობს, ევროპას ამის შესაძლებლობა ნამდვილად არ აქვს. მაგრამ ბრიუსელს ნამდვილად შეუძლია უზრუნველყოს, რომ უკრაინელებმა ძალის პოზიციიდან ისაუბრონ და განაცხადონ, რომ თუ ჩვენი პირობები მიუღებელია, მაშინ ბრძოლას გავაგრძელებთო“, – დასძინა ესტონელმა ბრიგადის გენერალმა.
https://news.err.ee/1609935749/mep-no-one-would-listen-to-an-eu-envoy-at-us-ukraine-russia-peace-talks