დავით როსტომაშვილის ცემის ფაქტზე დაკავებული ზურა ქუთელიას დედა მარინა მიქაძე მომხდარს დავით როსტომაშვილის შურისძიებას უკავშირებს.
“პრაიმტაიმთან” საუბარში მარინა მიქაძე ამბობს, რომ ზურა იმ ბიჭის ახლობელია, რომელთანაც დავით როსტომაშვილს აქვს დავა, თავისი ბიზნესის გამო.
“ამ ყველაფერს ვუკავშირებ შურისძიებას. როსტომაშვილს დავა აქვს კვიციანებთან და იმის გამო, რომ ზურა ბექა კვიციანის ახლობელია, ზუსტად ამიტომ არის აყვანილი. ბექა და ზურა უბნელები არ არიან, მაგრამ ქვედა ქუჩაზე ცხვორობს ბექა. მათ ბიზნესის გამო აქვთ დავა”, -განაცხადა მარინა მიქაძემ.
მას დავის დეტალებზე ინფორმაცია არ აქვს.
დაკავებულის დედა ამტკიცებს, რომ ზურა ქუთელია ფიზიკურად ვერ მოახერხებდა თავდასხმის ადგილზე იმ მომენტისთვის ყოფნას, რადგან იმ დროს სახლის ეზოში იმყოფებოდა, რასაც მასთან ერთად მყოფი ბიჭებიც ადასტურებენ.
“ზურა დარბაზიდან სახლში 15:45 წუთზე მოვიდა, ტანსაცმელი გამოიცვალა და ჩავიდა ეზოში. ვერანაირად ვერ მოასწრებდა ის გაბრიელ სალოსის ქუჩაზე მისვლას, სადაც თავდასხმა მოხდა”,- აღნიშნა მარინა მიქაძემ.
მისივე ინფორმაციით, ზურა მომხდარიდან 9 საათის შემდეგ არის დაკავებული სახლიდან 50 მეტრში.
შინაგან საქმეთა სამინისტროს ინფორმაციით, ყაჩაღობის ფაქტი მოხდა 2017 წლის 14 ივნისს, 15:51 საათზე. სპორტდარბაზში დამონტაჟებული ვიდეოკამერის ჩანაწერში ზურაბ ქ.-ს დარბაზიდან გასვლის ფაქტი დაფიქსირებულია 2017.08.14 (2017 წლის 14 აგვისტო), 15:40 საათზე.
www.primetime.ge