10 თებერვალს, პოლონეთის სამხედრო კონტრდაზვერვის უფროსმა უარყო რუსული ბრალდებები, თითქოს, პოლონური სპეცსამსახურები რუსეთსა და ბელარუსში დივერსიული თავდასხმების ორგანიზებაში მონაწილეობდნენ. ასეთ განცხადებებს მან „ტიპური დეზინფორმაცია“ უწოდა.
პოლონეთის სამხედრო კონტრდაზვერვის სამსახურის ხელმძღვანელმა, ბრიგადის გენერალმა იაროსლავ სტროჟიკმა პოლონეთის სახელმწიფო საინფორმაციო სააგენტო PAP-ს განუცხადა, რომ რუსეთის უსაფრთხოების ფედერალური სამსახურის (ФСБ) ბრალდებები შიდა აუდიტორიაზე გათვლილი შეთხზული ნარატივებია.
„ეს დეზინფორმაციის კლასიკური მაგალითია“, – აღნიშნა სტროჟიკმა რუსული მედიის მიერ ბოლო პერიოდში გავრცელებული ინფორმაციის საპასუხოდ, რომლის მიხედვითაც, რუსეთის სამხედრო დაზვერვის (ГРУ) უფროსის მოადგილის, ვლადიმერ ალექსეევის მკვლელობის წარუმატებელი მცდელობის შემსრულებლის გადაბირებაში პოლონურ დაზვერვას ედება ბრალი.
რუსეთის სამხედრო დაზვერვა ასევე ირწმუნება, რომ დასავლეთის ქვეყნები, მათ შორის პოლონეთი, აქტიურად მუშაობენ ბელარუსის ლიდერის, ალექსანდრე ლუკაშენკოს რეჟიმის შესარყევად და პოლიტიკური ცვლილებების მოსახდენად.
„ასეთი გზავნილები ჩნდება ყოველთვის, როცა კი ამის შესაძლებლობა ეძლევათ“, – განაცხადა სტროჟიკმა და დასძინა, რომ ეს ნარატივები ემსახურება რუსეთისა და ბელარუსის ისე წარმოჩენას, თითქოს, ისინი ნატო-სა და დასავლეთის მხრიდან მუდმივი ზეწოლის ქვეშ არიან: „მსგავსი დეზინფორმაცია, ძირითადად, შიდა მოხმარებისთვის იქმნება“.
პოლონელმა ბრიგადის გენერალმა შეშფოთება გამოხატა იმის გამო, რომ „ასეთი ყალბი რიტორიკა ხვდება ისეთ პატივსაცემ გამოცემებში, როგორიცაა „როიტერი“, რასაც სტროჟიკმა „სულ მცირე, შემაშფოთებელი“ უწოდა.
მან ხაზგასმით აღნიშნა, რომ პოლონეთის სადაზვერვო სამსახურების ყველა ქმედება კანონიერია და მთავრობისა და პრეზიდენტის მიერ დამტკიცებული პოლიტიკური დირექტივების შესაბამისად ხორციელდება.
კითხვაზე, თუ როგორ უნდა აღუდგნენ წინ მზარდ რუსულ პროპაგანდას, სტროჟიკმა განაცხადა: „ამის ერთი ეფექტური მეთოდი ან რეცეპტი არ არსებობს“, თუმცა იქვე განმარტა, რომ დეზინფორმაციასთან დაპირისპირება და მისი მხილება უფრო ეფექტურია, ვიდრე მისი იგნორირება. მისი აზრით, სადაზვერვო სამსახურებმა უფრო მეტად უნდა იაქტიურონ და გამოაქვეყნონ საჯარო ანგარიშები, სადაც დეზინფორმაციის სხვადასხვა ტაქტიკა იქნება აღწერილი.
ამასთან დაკავშირებით, პოლონეთის სამხედრო კონტრდაზვერვის სამსახურის ხელმძღვანელმა ყურადღება გაამახვილა რუსული და ბელარუსული გავლენის შესახებ პოლონური კომისიის 2024–2025 წლების ანგარიშზე, რომელშიც კრემლის მიერ გამოყენებული პროპაგანდისტული თემებია აღწერილი. ამ პროპაგანდისტულ თეზისებში ნატო და ევროკავშირი „მჩაგვრელ კოლონიურ ძალებად“ არიან წარმოჩენილნი. ზემოთ აღნიშნულ ანგარიშში ასევე ხაზგასმულია პოლონეთის მხრიდან სისტემური საპასუხო ზომების ნაკლებობა და გამოთქმულია რეკომენდაცია სახელმწიფოსა და მედიას შორის უფრო ძლიერი კოორდინაციის თაობაზე.
სტროჟიკის თქმით, რუსეთი ყოველწლიურად დაახლოებით 2–4 მილიარდ აშშ დოლარს ხარჯავს გავლენის ოპერაციებზე, მათ შორის – სოციალური მედიის საშუალებით პროპაგანდის იაფად და მასობრივად გავრცელებაზე. „ეს საფრთხე წლებია არსებობს“, – დასძინა მან.
წყარო: „პოლონეთის რადიო“