ტორბიორნ იაგლანდის ადვოკატების განცხადებით, 12 თებერვალს პოლიციამ მათი კლიენტის სახლი გაჩხრიკა.
რამდენიმე ნორვეგიული მედიასაშუალების მიერ გავრცელებულ კადრებში ჩანს, როგორ დაატარებენ ყუთებს გამომძიებლები ოსლოში მდებარე იაგლანდის სახლში.
ნორვეგიელმა სამართალდამცავებმა ეს ოპერაცია მას შემდეგ ჩაატარეს, რაც ევროპის საბჭომ, რომელსაც 2009-დან 2019 წლამდე თავად იაგლანდი ედგა სათავეში, ნორვეგიის ყოფილ პრემიერ-მინისტრს დიპლომატიური იმუნიტეტი მოუხსნა.
პოლიციამ ტორბიორნ იაგლანდის საცხოვრებელ და სააგარაკო სახლებში ჩხრეკა ჩაატარა ამჟამად მიმდინარე გამოძიების ფარგლებში, რომელიც 2019 წელს ციხეში გარდაცვლილ ამერიკელ სექსუალურ დამნაშავე, ჯეფრი ეპშტეინსა და ცნობილ ნორვეგიელ პერსონებს შორის კავშირებს სწავლობს.
ადვოკატმა აღნიშნა, რომ იაგლანდს ბრალი ედება კორუფციაში, რომელიც მან „დამამძიმებელ გარემოებებში“ ჩაიდინა.
გარდა იმისა, რომ ნორვეგიის პრემიერ-მინისტრის პოსტი ეკავა, იაგლანდი ასევე იყო ქვეყნის საგარეო საქმეთა მინისტრი და ნობელის მშვიდობის პრემიის კომიტეტის თავმჯდომარე.
როგორც გაზეთ „აფთენპოსტენთან“ საუბრისას ყოფილმა მაღალჩინოსანმა აღნიშნა, „მოსახრულია იმით, რომ ამ საკითხს, ბოლოს და ბოლოს, ნათელი მოეფინება“. ადვოკატმა კი დასძინა, რომ მის კლიენტს სურს, რაც შეიძლება სწრაფად დაიკითხოს, რათა მომავალში მასთან დაკავშირებით კითხვის ნიშნები აღარ არსებობდეს.
ჯეფრი ეპშტეინის ფაილებიდან ირკვევა, რომ იაგლანდი და მისი ოჯახი გეგმავდა ვიზიტს ამერიკელი ფინანსისტის სახლებში პალმ-ბიჩში (ფლორიდა) და კარიბის ზღვის კუნძულზე. თავად იაგლანდმა ეპშტეინის კერძო კუნძულზე სტუმრობა უარყო.
2014 წლით დათარიღებულ ელექტრონულ წერილში ის ეპშტეინს დახმარებას სთხოვს ოსლოში მდებარე ერთ-ერთი ბინის დაფინანსებაში.
სხვა მასალებიდან კი დგინდება, რომ მოგვიანებით, 2018 წელს ეპშტეინმა იაგლანდს რუსეთის საგარეო საქმეთა მინისტრ სერგეი ლავროვთან შეხვედრის ორგანიზება სთხოვა იმ მოტივით, რომ მნიშვნელოვანი ინფორმაცია გააჩნდა პრეზიდენტ ვლადიმერ პუტინისთვის გადასაცემად. სხვა ინფორმაციით, იაგლანდი, თითქოს, დაჰპირდა, რომ ამ საკითხს ლავროვის მრჩეველთან განიხილავდა.
აშშ-ის იუსტიციის დეპარტამენტის მიერ ეპშტეინთან დაკავშირებული მილიონობით შიდა დოკუმენტის გამოქვეყნება ააშკარავებს მის კავშირებს ევროპის ბიზნესის, აკადემიური, სამთავრობო და სამეფო სექტორის სხვადასხვა ფიგურებთან.
https://www.rtp.pt/noticias/mundo/ficheiros-de-epstein-policia-fez-buscas-nas-casas-de-ex-primeiro-ministro-da-noruega_n1718574