რუმინეთი არის ცალსახა მაგალითი, თუ როგორ შეუძლიათ, ყოველგვარი საფუძვლის გარეშე სუვერენული სახელმწიფოს საქმეებში ჩაერიონ, თითიდან გამოწოვილი მიზეზებით უკვე შემდგარი არჩევნების პირველი ტური გააუქმონ და დღის წესრიგში დააყენონ ისეთი პოლიტიკური მოცემულობა, რაც ამ კონკრეტული ქვეყნის ინტერესებში არ შედის, – განაცხადა გადაცემაში „EURO ანატომია“ საპროცედურო საკითხთა და წესების საპარლამენტო კომიტეტის თავმჯდომარემ დავით მათიკაშვილმა რუმინეთის სასამართლოს მიერ არჩევნების შედეგების გაუქმებაზე საუბრისას.
მისივე თქმით, არაფორმალური გავლენები, იგივე „დიფ სთეითი“ უხეშად ერევა ქვეყნების შიდა საქმეებში და ინსტრუმენტად იყენებს ევრო ჩინოსნობას. მათიკაშვილის შეფასებით, ნათელია, რომ ურთიერთობების ამ დიაპაზონში თითოეული სახელმწიფოსთვის სუვერენიტეტის დაცვა არის ამოსავალი წერტილი ამ ქვეყნის გადარჩენის და ნათელი მომავლის.
„ეს ყველაფერი ძალიან კარგად გამოჩნდა რუმინეთის მაგალითზე, სადაც ასე უხეშად ჩაერივნენ ქვეყნის შიდა საქმეებში, სასამართლო ინსტრუმენტად გამოიყენეს და გააკეთეს ის, რასაც აპირებდნენ საქართველოს შემთხვევაშიც“, – აღნიშნა დავით მათიკაშვილმა.