იტალიის პრემიერ-მინისტრი ჯორჯია მელონი აცხადებს, რომ არ ეთანხმება გერმანიის კანცლერის, ფრიდრიხ მერცის პოზიციას, რომელიც მან მიუნხენის უსაფრთხოების კონფერენციაზე გააჟღერა.
როგორც მელონიმ იტალიურ გაზეთთან ინტერვიუში აღნიშნა, არ ეთანხმება აშშ-ის ადმინისტრაციის შესახებ მერცის კრიტიკას და არც მის იმ მოწოდებას, რომლის მიხედვითაც, ევროპამ უარი უნდა თქვას შეერთებულ შტატებზე დამოკიდებულებაზე. მელონის თქმით, ამერიკა და ევროპა ურთიერთობებში „განსაკუთრებულ“ ეტაპზე არიან.
იტალიის პრემიერ-მინისტრის განცხადებით, გერმანიის კანცლერს ეთანხმება იმ ნაწილში, რომ ევროპამ ყურადღება საკუთარ თავზე უნდა გაამახვილოს და უსაფრთხოების სფეროში მეტი გააკეთოს.
„ვფიქრობ, მერცი მართალია, როდესაც ამბობს, რომ ევროპამ საკუთარ თავზე უნდა გაამახვილოს ყურადღება და მეტი გააკეთოს, მაგალითად, უსაფრთხოების სფეროში, დაწყებული ნატო-ს ევროპული სვეტიდან. ამას ვეთანხმები“, – განაცხადა ჯორჯია მელონიმ.
თუმცა იტალიის პრემიერმა უარყო ნებისმიერი მოსაზრება იმასთან დაკავშირებით, რომ ევროპამ დამოუკიდებლად, აშშ-თან თანამშრომლობის გარეშე უნდა იმოქმედოს.
„ამის ნაცვლად, ჩვენ უნდა ვიმუშაოთ ევროპასა და შეერთებულ შტატებს შორის უფრო მეტი ინტეგრაციისთვის. ყველასთვის, განსაკუთრებით კი ევროპული ქვეყნებისთვის, უმნიშვნელოვანესია იმის გაძლიერებაზე მუშაობა, რაც გვაერთიანებს და არა იმაზე, რაც შეიძლება, გვყოფდეს“, – განაცხადა ჯორჯია მელონიმ.
გარდა ამისა, იტალიის პრემიერ-მინისტრმა უარყო გერმანიის კანცლერის სიტყვები ევროპაში მოძრაობა MAGA-ს გავლენის შესახებ და აღნიშნა, რომ ეს „ევროკავშირის იურისდიქციაში შეშფოთების საკითხს არ წარმოადგენს“.