საქართველო-აშშ-ს ურთიერთობების მეტ-ნაკლებად გააქტიურებაზე ქართულ პოლიტიკურ სპექტრში შექმნილ აჟიოტაჟს გამოეხმაურა „ხალხიხ ძალის“ წევრი დავით ქართველიშვილი. როგორც მან ჟურნალისტებთან საუბრისას განაცხადა, საჭიროა მეტი სიბრძნე და სიდინჯე.
დავით ქართველიშვილმა ხაზი გაუსვა იმას, რომ სწორედ ამერიკის შეერთებული შტატებია, სხვა გიგანტებთან ერთად, ის ქვეყანა, რომელიც განსაზღვრავს საქართველოს მომავალს.
„როდესაც ხელისუფლება, პრეზიდენტი, საგარეო საქმეთა მინისტრი, სუს-ის ხელმძღვანელი ცდილობენ ფორმალური თუ არაფორმალური სამუშაო კონტაქტები დაამყარონ თავის კოლეგებთან (სუს-ის ხელმძღვანელი სპეცსამსახურების ხაზით, პრეზიდენტი ყაველაშვილი ვიცე-პრეზიდენტთან და სახელმწიფო მდივანთან კომუნიკაციის სახით), ამაზეც ისმის ისტერიული წამოძახილები, რომ საკმარისია, შევეშვათ ამერიკელებთან მეგობრობას, ჩავიდეთ მოსკოვში და იქ რაღაცები დავიწყოთ – გავხსნათ რკინიგზა და ა.შ.
მაშინ, როდესაც იმ დიდი გარიგების ერთ-ერთი წამყვანი ვიოლინო, თუ არა დირიჟორი, იქნება აშშ-ს ახლანდელი ადმინისტრაცია, რომელთანაც პირიქით, რაც შეიძლება მეტი კონტაქტი უნდა გვქონდეს, იმიტომ, რომ ამაზეა დამოკიდებული ჩვენი მომავალი ბედი, რომელსაც გადაწყვეტენ ამერიკის შეერთებული შტატები, რუსეთი და დიდი ალბათობით, ჩინეთიც.
ეს მეტიჩრობა და სულსწრაფობა ქართულ პოლიტიკურ წრეებში (ამ თვისებებს ვერ ვიტან), როდესაც ყველა უცებ ხდება პოლიტოლოგი, ვირუსოლოგი, იმუნოლოგი, არაბოლოგი და ა.შ. უნდა ჩაანაცვლოს მეტმა სიბრძნემ – თითოეული სიტყვა უნდა გაიზომოს. ენაზე კბილის დაჭერა არის ძალიან დიდი ხელოვნება და ამიტომ, შეეშვით კომენტარებს. ძალიან სწორად იქცევა ჩვენი ხელისუფლება – რუსეთმაც იცის ეს და ამერიკის შეერთებულმა შტატებმაც,“ – განაცხადა დავით ქართველიშვილმა.