პოლონეთში ლეგალურად რეგისტრირებული ცეცხლსასროლი იარაღის რაოდენობამ პირველად გადააჭარბა 1 მილიონს, რაც ნებართვების მკვეთრმა ზრდამ განაპირობა. ამის ფონზე, ექსპერტები და პოლიტიკოსები ზედამხედველობისა და სამედიცინო შემოწმების გამკაცრებას ითხოვენ.
„ევრონიუსის“ ცნობით, 2025 წელს პოლონეთში იარაღის ტარების რეკორდული რაოდენობის (50 700) ნებართვა გაიცა, რამაც რეგისტრირებული სამოქალაქო ცეცხლსასროლი იარაღის საერთო რაოდენობა 1 037 778-მდე გაზარდა. ეს მაჩვენებელი 107 000-ზე მეტით აღემატება 2024 წლის მონაცემებს. გასული წლის ბოლოსთვის აქტიური ნებართვების რაოდენობამ 411 769-ს მიაღწია (შედარებისთვის) – 2015 წელს ეს რიცხვი 192 819 იყო).
2025 წელს გაცემული ნებართვების ყველაზე დიდი წილი საკოლექციო იარაღზე მოდის – 21 071, მას მოსდევს სპორტული იარაღის ტარების ნებართვები (17 601) და ნებართვები პირადი დაცვის მიზნით (7 254).
იარაღის ფლობის მაჩვენებლის ზრდა 2022 წელს დაიწყო, როდესაც 37 402 ახალი ნებართვა გაიცა (წინა წელს ეს რიცხვი 19 939 იყო). იმავე წლის თებერვალში, უკრაინაში რუსეთის სრულმასშტაბიანი შეჭრიდან მომდევნო კვირებში, პოლონურ სასროლეთებში ვიზიტორთა რაოდენობის მკვეთრი ზრდა დაფიქსირდა.
ასეთი ზრდის მიუხედავად, პოლონეთში ყოველ 100 მცხოვრებზე კვლავ დაახლოებით 2,5 ცეცხლსასროლი იარაღი მოდის, რაც, კვლევის მონაცემებით, ყველაზე დაბალი მაჩვენებელია ევროკავშირში. გაცილებით მაღალი დონე ფიქსირდება ისეთ ქვეყნებში, როგორებიცაა ფინეთი, ავსტრია და კვიპროსი.
შედარებისთვის: შეერთებულ შტატებში, სადაც იარაღის ფლობის უფლება კონსტიტუციის მეორე შესწორებით არის გარანტირებული, 100 მცხოვრებზე დაახლოებით 120 ერთეული ცეცხლსასროლი იარაღი მოდის. აშშ-ში ცეცხლსასროლი იარაღით ჩადენილი მკვლელობების მაჩვენებელი მნიშვნელოვნად აღემატება ევროკავშირის საშუალო მაჩვენებელს, სადაც რეგულაციები, ზოგადად, უფრო მკაცრია და ქვეყნების მიხედვით განსხვავდება.
წყარო: „ევრონიუსი“