კარგია, თუ ეს ადამიანები აცნობიერებენ მათ მიერ ჩადენილ დანაშაულს, – განაცხადა ევროპასთან ინტეგრაციის საპარლამენტო კომიტეტის თავმჯდომარემ ლევან მახაშვილმა 4 ოქტომბრის საქმის ბრალდებულებზე, რომელთა ნაწილმაც დანაშაული აღიარა და პროკურორებს საპროცესო შეთანხმების გაფორმების თხოვნით მიმართა.
„საზოგადოებამ ნახა, როგორ გაწირეს ეს ადამიანები კანონთან დაპირისპირებისთვის. ეს ადამიანები მიუშვეს წინა ხაზზე, მიუშვეს დაპირისპირებისთვის სამართალდამცველებთან და კანონთან, კანონის უზენაესობასთან.
კარგია, თუ ეს ადამიანები აცნობიერებენ მათ მიერ ჩადენილ დანაშაულს. წინასწარ ვერ გეტყვით, პროკურატურა რა გადაწყვეტილებას მიიღებს, მაგრამ ეს ზოგადი პოზიციაა, ჩვენ მოსმენილი გვაქვს პროკურატურისგან, რომ თუ ეს ადამიანები აღიარებენ დანაშაულს, გულწრფელად ინანიებენ, პროკურატურა მზად იქნება საპროცესო შეთანხმების გაფორმებისთვის. თუმცა, როგორ, რა პირობით, ეს სრულად არის პროკურატურის გადასაწყვეტი“, – განაცხადა მახაშვილმა.