სოფელ პაგირიაის მოსახლეობა ამბობს, რომ ხის პანელების მწარმოებელი გერმანული ქარხანა Homanit Lietuva-ს მიერ ჰაერის დაბინძურება და ხმაური აიძულებთ, ამ ადგილების დატოვებაზე იფიქრონ.
ვილნიუსის სამხრეთით მდებარე ამ სოფელს ორშაბათს ქვეყნის პრემიერ-მინისტრი, ინგა რუგინიენე ეწვია, რომელმაც აღიარა, რომ საცხოვრებელი ზონის შუაგულში ქარხნის აშენების გადაწყვეტილება შეცდომა იყო, თუმცა აღნიშნა, რომ ლიეტუვისთვის უცხოური ინვესტიცია მეტად მნიშვნელოვანია.
„აქ ქარხნის აშენების გადაწყვეტილება არასწორი იყო, შემდეგ კი პროცესები თოვლის გუნდასავით აგორდა“, – განაცხადა რუგინიენემ.
სოფლის მოსახლეობა პრემიერ-მინისტრს საპროტესტო პლაკატებით დახვდა და განუცხადა, რომ ქარხნის მუშაობის დაწყების შემდეგ, მათთვის აქ ცხოვრება გაუსაძლისი გახდა.
რობერტას დუდუტისი, რომელიც პაგირიაიში 50 წელია ცხოვრობს, ამბობს, რომ ქარხნის მუშაობის გამო, მისმა შვილებმა გადაწყვიტეს, გაყიდონ ქონება, რომელიც მან და მისმა მეუღლემ აჩუქეს, და სხვაგან გადავიდნენ საცხოვრებლად.
მოსახლეობის თქმით, ჰაერში ხშირად ხისა და ლაქის მძაფრი სუნი ტრიალებს. ისინი ასევე საუბრობენ ქარხანაში მომხდარ რამდენიმე ინციდენტზე, მათ შორის აღჭურვილობის გაუმართაობაზე, რამაც, სავარაუდოდ, გარემოში მავნე ნივთიერებების გაფრქვევა გამოიწვია.
მოსახლეობის თქმით, გასული წლის ბოლოს, ჩამდინარე წყლების შემგროვებელი ხაზები გაიჭედა, ხოლო ივნისში მიმდებარე ტერიტორიაზე ხის ბოჭკოები მიმოიფანტა.
ერთ-ერთმა მცხოვრებმა მუდმივი ხმაური აღწერა, როგორც „სახლის თავზე თვითმფრინავის ტრიალი, რომელიც არსად მიფრინავს“ და ამას „წამება“ უწოდა.
ვილნიუსის რაიონის მერმა, რობერტ დუხნევიჩმა განაცხადა, რომ ესმის მოსახლეობის შეშფოთება, თუმცა ინვესტიციის მასშტაბებზეც გაამახვილა ადგილობრივების ყურადღება.
„კარგად უნდა გვესმოდეს, რომ ეს არის 240 მილიონ ევროზე მეტი ოდენობის ინვესტიცია და დემონტაჟზე საუბარიც კი ზედმეტია, განსაკუთრებით გერმანული კაპიტალისა და მასში ჩართული სტრატეგიული პარტნიორების გათვალისწინებით“, – განაცხადა მან.
როგორც მერმა, ისე პრემიერ-მინისტრმა აღნიშნეს, რომ მარეგულირებელმა ორგანოებმა კომპანიის საქმიანობა და მის მიერ ჰაერის შესაძლო დაბინძურება უფრო აქტიურად უნდა აკონტროლონ.
„ინვესტიცია ძალიან მნიშვნელოვანია ლიეტუვისთვის, არა მხოლოდ საერთაშორისო, არამედ ადგილობრივ დონეზეც. თუმცა, ნებისმიერმა ინვესტორმა, ნებისმიერმა ბიზნესმა, რომელიც აქ მოდის და სამუშაო ადგილებს ქმნის, ჩვენი კანონები არ უნდა დაივიწყოს “, – აღნიშნა რუგინიენემ.
პაგირიაის სათემო ასოციაცია „მედეინას“ ხელმძღვანელი, ვიტაუტას ვისკუპაიტისი ამბობს, რომ კომპანია არაერთხელ შემოწმდა და რამდენჯერმე დაჯარიმდა კიდეც.
„ის ბევრჯერ შემოწმდა. დაჯარიმდა? დიახ, ალბათ, რამდენჯერმე“, – თქვა მან და დასძინა, რომ ადრინდელი დარღვევები შეეხებოდა საწარმოს მშენებლობას, გარემოზე ზემოქმედების სათანადო შეფასებისა და საჭირო ნებართვების გარეშე.
Homanit Lietuva-მ წერილობით კომენტარში აღნიშნა, რომ დაგეგმილი სამუშაოების გამო, ინტერვიუს მიცემა არ შეეძლო, თუმცა დასძინა, რომ კანონს იცავს და საზედამხედველო ორგანოებთან, ადგილობრივ თემთან და მუნიციპალიტეტთან თანამშრომლობს.
https://www.lrt.lt/en/news-in-english/19/2849227/torture-vilnius-district-residents-protest-german-factory-near-their-home