ამერიკის ჩრდილო-აღმოსავლეთი ბოლო ათწლეულების განმავლობაში ერთ-ერთ ყველაზე მძლავრ თოვლს ქარბუქს უმკლავდება. მერილენდიდან მეინამდე ქალაქები თოვლით არის დაფარული, რომლის სიმაღლე ზოგიერთ ადგილას 1 მეტრს აჭარბებს, ხოლო ათიათასობით ოჯახი ელექტროენერგიის გარეშეა დარჩენილი.
ხელისუფლების წარმომადგენლები ელექტროგადამცემ ქსელში ათასობით დაზიანებაზე საუბრობენ, სარეაბილიტაციო სამუშაოებში ჩართული ბრიგადები კი 18-საათიან ცვლებში, შეუსვენებლად მუშაობენ.
როდ-აილენდის შტატში თოვლის საფარმა 90 სანტიმეტრს გადააჭარბა და 1978 წლის ისტორიული თოვლის ქარბუქის რეკორდი მოხსნა. გზები კვლავ გაუვალია, ნაგვის გატანა შეჩერებულია, რამდენიმე სკოლა კი სწავლების დისტანციურ რეჟიმზე გადავიდა. მასაჩუსეტსში ყველაზე მეტად კეიპ-კოდის რეგიონი დაზარალდა, სადაც ათასობით მცხოვრები, გათბობისა და მოწყობილობების დამუხტვის მიზნით, სპეციალურ თავშესაფრებს აფარებს თავს.
-23 გრადუსი, ნახევარი მეტრი თოვლი
ERTnews-თან საუბრისას, ემიგრანტმა თეოდორე კარნავასმა ნიუ-იორკში არსებული ექსტრემალური პირობები დეტალურად აღწერა. მისი თქმით, ტემპერატურა -23 გრადუსამდე დაეცა, თოვლის საფარმა კი დაახლოებით ნახევარ მეტრს მიაღწია.
„როდესაც გავიღვიძეთ, ყველაფერი გაყინული დაგვხვდა – ავტომობილები, გზები, ტროტუარები. წაბორძიკების გარეშე რამდენიმე ნაბიჯის გადადგმაც კი შეუძლებელი იყო,“ – განაცხადა მან. უამინდობის მიუხედავად, ქალაქი თითქმის ჩვეულ რიტმში განაგრძობდა მუშაობას: „მხოლოდ ერთი დღე არ წავედით სამსახურში. მეორე დღეს ნიუ-იორკი ჩვეულ რიტმს დაუბრუნდა. აქ ხალხი ასეთ მოვლენებს მიჩვეულია.“
სტიქიასთან ბრძოლა
ნიუ-იორკის ბევრ რაიონში ტროტუარები კვლავ გაუვალია, რის გამოც შშმ პირები გადაადგილების პრობლემებზე ჩივიან.
როდ-აილენდში ტრაგიკული შემთხვევა მოხდა: ნახშირჟანგით (CO) ინტოქსიკაციის შედეგად, სტუდენტი გარდაიცვალა. ის მობილური ტელეფონის დამუხტვას ცდილობდა ავტომობილში, რომლის გამონაბოლქვის გამწოვი მილი თოვლით იყო დახშული.
მეტეოროლოგების შეფასებით, თოვლის ქარბუქი, ჯამურად, 9.46 მილიარდ ტონა წყალს შეიცავდა. ამ რაოდენობის ნალექი მხოლოდ მანჰეტენზე რომ მოსულიყო, დაახლოებით 1.6 კილომეტრის სიმაღლის თოვლის ფენას წარმოქმნიდა, ხოლო მხოლოდ როდ-აილენდში მოსვლის შემთხვევაში, ამ შტატს 8.5 მეტრზე მეტი სისქის თოვლით დაფარავდა.