სლოვაკეთი და უნგრეთი ნავთობსადენ “დრუჟბას“ გამო უკრაინის წინააღმდეგ ერთიანი ფრონტით გამოდიან

უნგრეთის შემდეგ, დაეძაბება თუ არა უკრაინას ურთიერთობები სლოვაკეთთან? ვიდრე ამ საკითხს ნათელი მოეფინება, სლოვაკეთის პრემიერ-მინისტრი, რობერტ ფიცო მოლაპარაკებებს გამართავს ევროკომისიის პრეზიდენტ ურსულა ფონ დერ ლაიენთან, რათა რუსეთის თავდასხმის შედეგად დაზიანებული ნავთობსადენი „დრუჟბა“ ექსპერტებმა მოინახულონ.

ფიცოსა და ფონ დერ ლაიენის შეხვედრა სლოვაკეთისა და უნგრეთის მხრიდან უკრაინაზე მზარდი ზეწოლის ფონზე გაიმართება. ოფიციალური ბუდაპეშტი და ბრატისლავა, ნავთობსადენ „დრუჟბას“ მეშვეობით, რუსული ნავთობის მიწოდების აღდგენას კატეგორიულად ითხოვენ. ენერგეტიკული ობიექტი იანვარშინ განხორციელებული თავდასხმის შედეგად დაზიანდა. კიევი აცხადებს, რომ ნავთობსადენი მუშაობას ერთ თვეში უფრო ნაკლებ დროში ვერ განაახლებს. თავის მხრივ, სლოვაკეთი და უნგრეთი მოითხოვენ, რომ „დრუჟბა“ მათმა ექსპერტებმა მოინახულონ, თუმცა კიევიდან პასუხი ჯერ არ მიუღიათ.

რობერტ ფიცო, სლოვაკეთის პრემიერ-მინისტრი: „ევროკომისიის პრეზიდენტს შევთავაზებ სარემონტო სამუშაოებში სლოვაკეთის მონაწილეობას. თუ მართლაც არსებობს საჭიროება, რომ უკრაინაში, ნავთობსადენ „დრუჟბას“ რომელიმე მონაკვეთზე ჭანჭიკი დაეჭიროს – დაე, ასე იყოს. თუმცა, ბრიუსელისთვის გადასაცემი უფრო მნიშვნელოვანი გზავნილი ის იქნება, რომ სლოვაკეთი მზადაა, საჭიროების შემთხვევაში, უნგრეთისგან ესტაფეტა გადაიბაროს“.

ფიცომ ასევე აღნიშნა, რომ შესაძლოა, სლოვაკეთმა, უნგრეთის კვალდაკვალ, კიევისთვის განკუთვნილი 90 მილიარდი ევროს ოდენობის სესხი დაბლოკოს.

რობერტ ფიცო, სლოვაკეთის პრემიერ-მინისტრი: „უკრაინისთვის ამ უზარმაზარი სამხედრო საჩუქრის დაბლოკვა ლეგიტიმური ინსტრუმენტია ნავთობის მიწოდების აღდგენის მისაღწევად. ნებისმიერ შემთხვევაში, ბურთი ახლა ევროკავშირის მოედანზეა“.

ბუდაპეშტი და ბრატისლავა, რომლებიც კვლავ ახდენენ რუსული ნავთობის იმპორტს, კიევს, პოლიტიკური მიზეზების გამო, ნავთობსადენის შეგნებულად არშეკეთებაში ადანაშაულებენ. გასული კვირის ბოლოს ევროკომისიამ განაცხადა, რომ ეძებს გზებს მილსადენის მეშვეობით ნავთობის მიწოდების აღსადგენად, მათ შორის – ფინანსური დახმარების გაწევის მეშვეობით.

ამასობაში, უკრაინის პრეზიდენტი, ვოლოდიმირ ზელენსკი კიევში ნიდერლანდების პრემიერ-მინისტრ რობ იეტენს მასპინძლობს. ორმა ლიდერმა იარაღის ერთობლივი წარმოების შესაძლებლობა განიხილა და ომში დაღუპულებს მიაგო პატივი.