უკრაინელი არქიტექტორი და ხელოვანი, ანა კამიშანი ვენეციის ბიენალეზე წარადგენს ინსტალაციას სახელწოდებით, „ნაბატელე“ (Nabatele). პროექტის დაფინანსებაში მას რუსი ბიზნესმენი, ევგენი ჩიჩვარკინი დაეხმარება.
ამის შესახებ ინსტაგრამზე თავად ევგენი ჩიჩვარკინმა დაწერა.
პროექტი საქველმოქმედო ვახშმის მეშვეობით დაფინანსდება, რომელსაც რუსი მეწარმე ევგენი ჩიჩვარკინი გაერთიანებულ სამეფოში მდებარე მიშლენის ვარსკვლავის მქონე თავის რესტორანში აწყობს. ვახშამზე დასწრება 25 ათასი ფუნტი სტერლინგი ეღირება, ხოლო შეგროვებული თანხა ინსტალაციის მომზადებას მოხმარდება.
პროექტი „ნაბატელე“ ჩაფიქრებულია, როგორც ფართომასშტაბიანი ინსტალაცია ღია ცის ქვეშ – მცურავი სინაგოგა ვენეციის ლაგუნის თავზე აღიმართება. კონცეფციის თანახმად, საჰაერო კონსტრუქცია ცაში 25 მეტრის სიმაღლეზე ავა და ტერიტორიული საზღვრების არმქონე თავშესაფრისა და გეოგრაფიულ საზღვრებს მიღმა არსებული იდენტობის სიმბოლო იქნება.
ინსტალაციის სახელწოდება (Nabatele) ნიშნავს „განგაშს საფრთხის დროს“. თავის ნამუშევარში კამიშანი ეხება ვენეციის ებრაული თემის ისტორიას: წარსულში არსებული შეზღუდვები შენობების პირველ სართულზე სინაგოგების აშენების უფლებას არ იძლეოდა, ამიტომ მათ ურბანული სივრცის ზემოთ ათავსებდნენ. არტისტი ამ ისტორიის ინტერპრეტირებას საკრალური ნაგებობის მეშვეობით ახდენს, რომელიც ქალაქის თავზე მაღლდება, ამ სიტყვების პირდაპირი გაგებით.
ინსტალაცია წარდგენილი იქნება პავილიონ „იდიშლანდის“ფარგლებში. ეს არის ცალკე, დამოუკიდებელი პროექტი, რომელიც იდიშის კულტურას, დიასპორის გამოცდილებასა და კულტურული მობილობის საკითხებს ეძღვნება. ბიენალეზე წარდგენის შემდეგ, ნამუშევრის ჩვენება მსოფლიოს სხვა ქალაქებშიც იგეგმება.
ანა კამიშანი არის არქიტექტორი, ხელოვანი და ურბანული სივრცის მკვლევარი ქალაქ ლვოვიდან. ადრე ის ბაბი-იარის ჰოლოკოსტის მემორიალურ ცენტრში კონცეპტუალური განვითარებისა და კვლევითი პროექტების დეპარტამენტის დირექტორად მუშაობდა. მანამდე კი, შვიდი წლის განმავლობაში, მოსკოვში საქმიანობდა, მათ შორის – მდინარე მოსკოვთან დაკავშირებულ პროექტებზე.
2023 წელს „უკრაინსკა პრავდას“ გამოძიებამ გამოააშკარავა, რომ ის რუსი ოლიგარქის, მიხეილ ფრიდმანის პარტნიორი იყო. ამჟამად უცნობია, არიან თუ არა ისინი კვლავ ურთიერთობაში.
ცოტა ხნის წინ გავრცელდა ინფორმაცია, რომ უკრაინაში სრულმასშტაბიანი ომის დაწყების შემდეგ პირველად, რუსეთი ვენეციის ბიენალეზე ოფიციალურად ბრუნდება.
https://suspilne.media/culture/1262376-arhitektorka-z-ukraini-predstavit-letucu-sinagogu-na-venecijskij-bienale-iz-cim-dopomoze-rosijskij-biznesmen/