პენტაგონის გამოძიებამ დაადგინა, რომ უკრაინის მხარდამჭერი საკოორდინაციო დანაყოფის ყოფილმა მეთაურმა, გენერალმა ანტონიო აგუტომ, კიევში ვიზიტის დროს, ტვინის შერყევა მიიღო, ხოლო პოლონეთის ტერიტორიაზე მგზავრობისას, საიდუმლო სამხედრო რუკები მატარებელში დატოვა.
„პოლონეთის რადიოს“ ცნობით, გამოძიება, რომელიც ანონიმური საჩივრების საფუძველზე დაიწყო, ეხებოდა 2024 წლის მაისში კიევში აგუტოს ვიზიტს, როდესაც ის ჯერ კიდევ ხელმძღვანელობდა „უკრაინის უსაფრთხოების დახმარების ჯგუფს“ (SAG-U).
პენტაგონის ანგარიშის თანახმად, აგუტომ, ერთ-ერთი ვახშმის დროს, ორი ნახევარლიტრიანი ბოთლი ქართული ჭაჭა დალია, რომლის ალკოჰოლის შემცველობა 40-50 გრადუსია. გავრცელებული ინფორმაციით, ის მომდევნო დღესაც ნასვამ მდგომარეობაში იმყოფებოდა, მათ შორის – ოფიციალურ შეხვედრებზეც, რომელთაგან ერთ-ერთი აშშ-ის მაშინდელ სახელმწიფო მდივანთან, ენტონი ბლინკენთან გაიმართა.
გამოძიებამ დაადგინა, რომ ნასვამ მდგომარეობაში მყოფი გენერალი, სულ მცირე, სამჯერ დაეცა ძირს და ტვინის შერყევა მიიღო.
კიევიდან გერმანიაში, ვისბადენში მდებარე SAG-U-ს შტაბ-ბინაში დაბრუნებისას, აგუტოს გუნდმა, პოლონეთის ტერიტორიაზე გავლისას, მატარებელში „საიდუმლო“ გრიფის მქონე სამხედრო რუკები დატოვა. ცილინდრულ სამხედრო კონტეინერში მოთავსებული რუკები მეორე დღეს იპოვეს და, როგორც ჩანს, მათთვის ხელი არავის უხლია.
მიუხედავად იმისა, რომ მატარებელში რუკები პირადად აგუტოს არ დაუტოვებია, მომხდარზე პასუხისმგებლობა მან თავის თავზე აიღო.
გენერალმა განაცხადა, რომ ევროპაში აშშ-ის არმიის მეთაურისგან მიიღო სიტყვიერი ნებართვა, „დაშვებულ ორ ულუფაზე მეტი ალკოჰოლი“ დაელია და ხაზი გაუსვა აღმოსავლეთ ევროპაში სადღესასწაულო ვახშმებზე „ალკოჰოლის მიღების კულტურის მნიშვნელობას“.
აგუტოს ხელმძღვანელობით მოქმედი დანაყოფი 2022 წელს შეიქმნა და წამყვან როლს ასრულებდა უკრაინისთვის სამხედრო მარაგების მიწოდებასა და კოორდინაციაში. მოგვიანებით, 2024 წელს ვაშინგტონში გამართულ ნატო-ს სამიტზე მიღებული გადაწყვეტილებით, ეს ფუნქცია ალიანსს დაეკისრა.
წყარო: „პოლონეთის რადიო“, პოლონეთის სახელმწიფო საინფორმაციო სააგენტო PAP (Polska Agencja Prasowa)