აშშ-ის საიმიგრაციო და საბაჟო სამსახურის (ICE) მიერ დეპორტირებულ ბევრ უკრაინელს, სამშობლოში ჩასვლისთანავე, საწვრთნელ ცენტრებში გზავნიან, სადაც მათ ფრონტის წინა ხაზზე ბრძოლისთვის ამზადებენ.
აღნიშნულ ინფორმაციას CNN ავრცელებს. ამერიკული ტელეკომპანია იმ ათეულობით უკრაინელის შესახებ მოგვითხრობს, რომლებიც აშშ-ის საიმიგრაციო და საბაჟო სამსახურმა ქვეყნიდან გააძევა და ბრძოლის ველზე გაამწესა.
მას შემდეგ, რაც დონალდ ტრამპი თეთრ სახლში მეორე ვადით დაბრუნდა, შეერთებულ შტატებში საიმიგრაციო კონტროლი გამკაცრდა და მასობრივი დეპორტაციის კამპანია წამოიწყო.
თუმცა, სამხედრო გაწვევის ასაკის მქონე უკრაინელებისთვის დეპორტაცია, შესაძლოა, პირდაპირ ფრონტის ხაზზე მოხვედრას ნიშნავდეს, მითუმეტეს იმ პირობებში, როდესაც უკრაინის შეიარაღებულ ძალებში კადრების სერიოზული დეფიციტია.
უკრაინის მოქალაქეების გაძევება, ხშირ შემთხვევაში, არალეგალური მიგრაციის ყალბი ბრალდებების საფუძველზე განხორციელდა.
„როდესაც უკრაინისკენ მიმავალ თვითმფრინავში ვიჯექი, ვიცოდი, რაც მოხდებოდა. თუმცა, იმედს ვიტოვებდი, რომ სახლში მისვლის საშუალებას მაინც მომცემდნენ. ყველაფერი იმაზე სწრაფად მოხდა, ვიდრე წარმომედგინა. სახლამდე ვერ მივაღწიე; მშობლები დღემდე არ მინახავს“, – განუცხადა CNN-ს 28 წლის ვოლოდიმირ დუდნიკმა, რომელიც აშშ-დან დეპორტაციის შემდეგ, საზღვრის გადაკვეთისთანავე უკრაინელმა სამხედროებმა დააკავეს.
დუდნიკმა 51 დღე საბაზისო საწვრთნელ ბანაკში გაატარა, შემდეგ კი რამდენიმე კვირა დრონის ოპერატორის სპეციალობას ეუფლებოდა. ამჟამად ის აღმოსავლეთ უკრაინაში, ფრონტის წინა ხაზზე იბრძვის.
უკრაინის კანონმდებლობით, 25-დან 60 წლამდე ასაკის ყველა მამაკაცი მობილიზაციას ექვემდებარება. ქვეყნის თავდაცვის სამინისტროს მონაცემებით, დაახლოებით 2 მილიონი პირი ჯარში სამსახურზე უარის თქმის გამო იძებნება, ხოლო 200 000-მდე ჯარისკაცი – სამხედრო ნაწილის თვითნებურად მიტოვების გამო.
მათმა დიდმა ნაწილმა ქვეყანა დატოვა ან ჯარში გაწვევის სამსახურის ოფიცრებს ემალება, რომლებიც დეზერტირებს 24 საათის განმავლობაში ეძებენ.
ნოემბერში აშშ-ის საიმიგრაციო და საბაჟო სამსახურმა 45 უკრაინელის დეპორტაცია მოახდინა. უკრაინის სახელმწიფო სასაზღვრო სამსახურმა CNN-ს განუცხადა, რომ მათგან 24 პირი სავალდებულო სამხედრო სამსახურისთვის თავის არიდების გამო იძებნებოდა. ისინი პოლიციას გადასცეს, სამართალდამცავებმა კი სამხედრო კომისარიატში გადაიყვანეს.
ბევრი უკრაინელი შეერთებულ შტატებში ჰუმანიტარული პროგრამის – „გაერთიანებული უკრაინისთვის“ (U4U) – მეშვეობით მოხვდა. ჯო ბაიდენის ადმინისტრაციის ეს ინიციატივა უკრაინის მოქალაქეებს საშუალებას აძლევდა, აშშ-ში დროებით, ორი წლით ეცხოვრათ და ემუშავათ, ამ ვადის ამოწურვის შემდეგ კი დარჩენის გახანგრძლივება მოეთხოვათ.
2025 წლის იანვარში, დონალდ ტრამპის ინაუგურაციის შემდეგ, აღნიშნული პროგრამა სხვა ჰუმანიტარულ შეღავათებთან ერთად შეჩერდა.
მას შემდეგ აშშ-ის მოქალაქეობისა და ემიგრაციის სამსახურმა (USCIS), რომელიც შიდა უსაფრთხოების დეპარტამენტის (DHS) შემადგენლობაშია, ახალი განაცხადების მიღება შეწყვიტა. უწყების განცხადებით, ბინადრობის ვადის გაგრძელების ინდივიდუალური მოთხოვნები მხოლოდ „გადაუდებელი ჰუმანიტარული მიზეზების ან მნიშვნელოვანი საზოგადოებრივი სარგებლის“ საფუძველზე დაკმაყოფილდება.
„უკრაინელების დაცვის მექანიზმები ფურცელზე კვლავ არსებობს… თუმცა, რეალურად, საიმიგრაციო და საბაჟო სამსახურს (ICE) აქვს უფლებამოსილება, რომ ნებისმიერი პირი დააკავოს“, – განუცხადა CNN-ს საიმიგრაციო და საერთაშორისო სამართლის სპეციალისტმა, ამერიკელ-უკრაინელმა ადვოკატმა, იულია ბიკბოვამ.
https://www.rtp.pt/noticias/mundo/kremlin-nega-pedido-de-putin-a-oligarcas-para-o-orcamento_n1729657