ილია მეორის ღვაწლზე და ბოლო დღეებში საპატრიარქოს მისამართით მიმდინარე კამპანიაზე ილაპარაკა ქადაგებისას ბოდბელმა მთავარეპისკოპოსმა. მეუფე იაკობის განმარტებით, ახალ, 142-ე პატრიარქს თავად სინოდი გამოარჩევს, რომელიც ღმერთისთვის სათნო იქნება. ვნებათაღელვა კი მისივე თქმით, მრევლს აბნევს.
„უწმინდესი არის სიყვარულისა და სიხარულის პატრიარქი, რომელიც ჩვენს ერს ბედნიერებასაც მოუტანს. რამდენი ეკლესია იყო მაშინ ღია და რამდენი ეკლესია, რამდენი მოძღვარი, რამდენი ბერმონაზვნობა დაგვიტოვა? [ილია მეორე] დიდი მნათობია ჩვენი ეკლესიისთვის. ავირჩევთ ახალ პატრიარქს და სინოდის თითოეული წევრი შევეცდებით, ისე მოვიქცეთ, რომ უფლისთვის სათნო იყოს და მხარში დავუდგეთ ერთმანეთს.
ახლა ბევრი ვნებათაღელვაა. ქრისტიანმა ადამიანმა რომ დაიწყოს – ეს აირჩიეთ, ის აირჩიეთ, ეს ნიშნავს, რომ ქრისტესგან დაშორებულია. მე ვიცი, ვინც უნდა ავირჩიო. განა არ ვიცი? დღეს მთავარია, სინოდი ძლიერად ვიყოთ და როცა ავირჩევთ პატრიარქს, პატრიარქთან ერთად ერთი საქმე ვაკეთოთ, ერთსულოვნებით. ძალიან ძლიერი სინოდი დაგვტოვა და უწმინდესმა რა საქმეც დაიწყო, ბოლომდე გვაქვს მისაყვანი“, – განაცხადა მეუფემ.