8 აპრილს, უკრაინის საგარეო საქმეთა მინისტრმა ვაშინგტონს მოუწოდა, ცეცხლის შეწყვეტისა და 4 წელზე მეტი ხნის განმავლობაში მიმდინარე ომის დასრულების მიზნით, მოსკოვზე მოახდინოს ზეწოლა. ანდრეი სიბიგამ აღნიშნა, რომ შეერთებულ შტატებსა და ირანს შორის მიღწეული შეთანხმება „ამერიკული სიმტკიცის“ ეფექტურობაზე მეტყველებს.
„ამერიკის მტკიცე პოზიცია შედეგს იძლევა. მიგვაჩნია, რომ დროა გამოვიჩინოთ საკმარისი სიმტკიცე, რათა მოსკოვი ცეცხლის შეწყვეტაზე დავიყოლიოთ და უკრაინის წინააღმდეგ მის მიერ გაჩაღებული ომი დასრულდეს“, – დაწერა ანდრეი სიბიგამ სოციალურ ქსელ X-ში.
უკრაინელი დიპლომატი ასევე მიესალმა „პრეზიდენტ ტრამპსა და ირანის რეჟიმს შორის მიღწეულ შეთანხმებას ჰორმუზის სრუტის განბლოკვისა და ცეცხლის შეწყვეტის შესახებ, ისევე როგორც პაკისტანის შუამავლობის მცდელობებს“.
უკრაინაზე რუსეთის თავდასხმები გრძელდება
„გასულ ღამეს რუსულმა დრონებმა დარტყმა მიაყენეს იზმაილს – უკრაინის ყველაზე დიდ საპორტო ქალაქს მდინარე დუნაიზე, რის შედეგად პორტის ინფრასტრუქტურა დაზიანდა“, – ეს ინფორმაცია უკრაინის რეგიონული განვითარების სამინისტრომ ოთხშაბათს „ტელეგრამ-არხზე“ გამოაქვეყნა.
„საწყობების ტერიტორიაზე ხანძარი გაჩნდა“, – იუწყება სამინისტრო და დასძენს, რომ ცეცხლი მაშველებმა ჩააქრეს.
რეგიონული ადმინისტრაციის ხელმძღვანელი, ივან ფედოროვი იმავე „ტელეგრამ-არხზე“ წერს, რომ სამშაბათი ღამიდან ოთხშაბათი დილამდე მოსკოვის მიერ ზაპორიჟიეს ოლქზე განხორციელებული თავდასხმების შედეგად, ერთი ადამიანი დაიღუპა.
„სოფელ ბალაბინში თავდასხმის დროს საცხოვრებელი და კომერციული შენობები დაინგრა და დაზიანდა, გაჩნდა ხანძარი“, – აღნიშნა მან და დასძინა, რომ „სახლის ნანგრევებში გარდაცვლილი ადამიანის ცხედარი იპოვეს“.
ზაპორიჟიე, რომელიც ქვეყნის სამხრეთ ნაწილში, ფრონტის ხაზთან ახლოს მდებარე მნიშვნელოვანი ინდუსტრიული ქალაქია, თითქმის ყოველდღიურად, რუსული დრონებისა და რაკეტების თავდასხმების სამიზნეს წარმოადგენს.
2022 წლის თებერვალში უკრაინაში რუსეთის ფართომასშტაბიანი შეჭრის დაწყებიდან თითქმის ყოველდღე, რუსული საჰაერო დარტყმების შედეგად, უკრაინაში მშვიდობიანი მოქალაქეები იღუპებიან. საპასუხოდ, კიევი აქტიურად ესხმის თავს რუსეთის ტერიტორიას, რაც ასევე იწვევს მსხვერპლს სამოქალაქო პირებს შორის.
https://www.rtp.pt/noticias/mundo/cessar-fogo-com-o-irao-kiev-pede-a-washington-que-concentre-os-seus-esforcos-na-ucrania_n1732217