თბილისის საქალაქო სასამართლო პრეზიდენტის სიძის მეგობრის მიხეილ თათარიშვილის მიმართ გამოტანილ გამამართლებელ განაჩენთან დაკავშირებით განცხადებას ავრცელებს.
როგორც სასამართლო განმარტავს, ბრალდების მხრიდან ვერ იქნა წარმოდგენილი, საკმარის მტკიცებულებათა ერთობლიობა, რომელიც გონივრულ ეჭვს მიღმა სტანდარტით დაადასტურებდა პირის ბრალეულობას.
”2017 წლის 7 ივლისს, თბილისის საქალაქო სასამართლომ ნარკოტიკული საშუალების განსაკუთრებით დიდი ოდენობით უკანონოდ შეძენისა და შენახვის ბრალდების საქმეზე ბრალდებული მიხეილ თ. უდანაშაულოდ ცნო და მის მიმართ გამამართლებელი განაჩენი დაადგინა.
საქმის მასალების თანახმად, მიხეილ თ.-მ უკანონოდ შეიძინა და ინახავდა განსაკუთრებით დიდი ოდენობით ნარკოტიკულ საშუალება „ბუპრენორფინს“- 0, 144 გრამის ოდენობით, რომელიც 2017 წლის 15 მარტს, სამართალდამცველებმა ხაშურის რაიონის დაბა სურამში ბრალდებულის პირადი ჩხრეკისას ამოიღეს.
სასამართლომ მიიჩნია, რომ ვერ იქნა წარმოდგენილი, საკმარის მტკიცებულებათა ერთობლიობა, რომელიც გონივრულ ეჭვს მიღმა სტანდარტით დაადასტურებდა პირის ბრალეულობას.
სასამართლოს განაჩენი შეიძლება გასაჩივრდეს გამოცხადებიდან ერთი თვის ვადაში, თბილისის სააპელაციო სასამართლოს სისხლის სამართლის საქმეთა პალატაში”, – ნათქვამია სასამართლოს განცხადებაში.