კუბის მთავრობამ განაცხადა, რომ მკაცრად გმობს აშშ-ის მიერ ყოფილი პრეზიდენტის, რაულ კასტროს წინააღმდეგ წაყენებულ „სამარცხვინო ბრალდებას“.
„ეს არის პოლიტიკური პროვოკაციის სამარცხვინო აქტი“, – ნათქვამია მთავრობის განცხადებაში.
განცხადებაში აღნიშნულია, რომ აშშ-ის მთავრობამ დაამახინჯა ფაქტები 1996 წელს კუბის მიერ ორი თვითმფრინავის ჩამოგდების შესახებ, რასაც ამერიკელი მოქალაქეების სიცოცხლე ემსხვერპლა – სწორედ ეს შემთხვევა დაუდო საფუძვლად აშშ-მა ოთხშაბათს კასტროს წინააღმდეგ წარდგენილ ბრალდებას.
კუბამ თვითმფრინავების ჩამოგდება იმით გაამართლა, რომ ეს მას შემდეგ გააკეთა, რაც აშშ-მა უგულებელყო კუბის მრავალი საჩივარი მისი საჰაერო სივრცის დარღვევის თაობაზე.
„უკიდურესად ცინიკურია, რომ ამ ბრალდებას აყენებს იგივე მთავრობა, რომელმაც სამხედრო ძალის არაპროპორციული გამოყენებით, ამერიკის შეერთებული შტატების ტერიტორიიდან შორს, კარიბის ზღვისა და წყნარი ოკეანის საერთაშორისო წყლებში, თითქმის 200 ადამიანი მოკლა და 57 გემი გაანადგურა“, – ნათქვამია განცხადებაში.
ტექსტში ასევე აღნიშნულია, რომ კასტროს წინააღმდეგ ბრალდების წარდგენა არის მცდელობა, გამართლდეს კუბელების მიმართ მიმართული „კოლექტიური სასჯელი“.