აშშ-ის პრეზიდენტი დონალდ ტრამპი აცხადებს, რომ ტაივანის ლიდერ ლაი ცინდესთან იარაღის შესაძლო მიყიდვის თაობაზე გამართავს საუბარს, რაც დიპლომატიური ტრადიციიდან მკვეთრი გადახვევა იქნება.
აშშ-ისა და ტაივანის ლიდერებს შორის პირდაპირი კომუნიკაცია 1979 წლის შემდეგ არ შემდგარა – მას შემდეგ, რაც ვაშინგტონმა ტაივანთან ოფიციალური კავშირები გაწყვიტა, რათა პეკინის მთავრობა ეღიარებინა.
ოთხშაბათს დასმულ კითხვაზე – გეგმავს თუ არა ლაისთან საუბარს აშშ-ის მიერ იარაღის მიყიდვაზე გადაწყვეტილების მიღებამდე, ტრამპმა განაცხადა: „მე მას დაველაპარაკები. ყველას ველაპარაკები… ჩვენ ვიმუშავებთ ამაზე, ტაივანის პრობლემაზე“.
მან ასევე ხაზი გაუსვა თავის „საოცარ“ ურთიერთობას ჩინეთის პრეზიდენტ სი ძინპინთან, გასულ კვირას პეკინში გამართული ორდღიანი სამიტის ფონზე. ტრამპმა აღნიშნა, რომ მას ჯერ კიდევ არ აქვს გადაწყვეტილი, განხორციელდება თუ არა ტაივანისთვის 14 მილიარდი დოლარის ღირებულების იარაღის პაკეტის მიყიდვა, რომელიც, გავრცელებული ინფორმაციით, დრონების საწინააღმდეგო აღჭურვილობასა და საჰაერო თავდაცვის სარაკეტო სისტემებს მოიცავს.
პეკინი ტაივანს საკუთარ ტერიტორიად მიიჩნევს. ლაი, რომელმაც თანამდებობა 2024 წელს დაიკავა და კუნძულის თავდაცვისუნარიანობის გასაძლიერებლად კამპანიას აწარმოებს. აშშ დიდი ხანია მხარს უჭერს ტაივანს და ვაშინგტონს კუნძულის თავდაცვის საშუალებებით უზრუნველყოფას 1979 წელს მიღებული კანონი ავალდებულებს. თეთრ სახლს ამ ვალდებულების ჩინეთთან დიპლომატიური ურთიერთობების შენარჩუნებასთან ბალანსირება უწევს.