ე.წ. ციანიდის საქმის ერთ-ერთმა პროკურორმა ზვიად გუბელაძემ მოწმე ტარას შავშიშვილის დაკითხვის შემდეგ განაცხადა, რომ ტარას შავშიშვილი დეკანოზთან მეგობრობდა და დაინტერესებულია, რომ ის გამართლდეს.
“ტარას შავშიშვილი არ არის გულწრფელი და არ მოგვახსენა დეტალურად თუ რა ნივთიერებები გადასცა დეკანოზს, როცა კონსპირაციულ ვითარებაში შეხვდა. მხოლოდ ის განაცხადა შავშიშვილმა, რომ დეკანოზს გადასცა ღვინო და ბარათი. სხვა დეტალებზე არ საუბრობს მოწმე. ფაქტია, რომ კონსპირაციულად შეხვდნენ ერთმანეთს ღამის 12 საათზე. თუ რა ეჭვები გვაქვს, თუ ვინ მიაწოდა ციანიდი დეკანოზს, ამაზე ჯერ ვერ გიპასუხებთ. ტარას შავშიშვილი ბრალდებულის უახლოესი მეგობარია. ისინი ერთად განიხილავდნენ სხვადასხვა სტრატეგიებს, პიარ კამპანიებს, მათ შორის სხვადასხვა სასულიერო პირების დისკრედიტაციას. შესაბამისად, ის არის დაინტერესებული პირი. სასამართლოს სხდომაზე არ დამალა და თქვა, რომ მას გული შეტკივა გიორგი მამალაძეზე და სურს, რომ ის გამართლდეს. შესაბამისად, შავშიშვილი აკეთებდა ბრალდებულისთვის სასარგებლო ინფორმაციის ტირაჟირებას და ასეთმა მოწმემაც კი ვერ დამალა ის ფაქტი, რომ დეკანოზს და შორენა თეთრუაშვილს ჰქონდა არასახარბიელო ურთიერთობა, იყვნენ დაპირისპირებულები. მოწმე ამბობდა, რომ თეთრუაშვილი რადგანაც ერეოდა ქონების საკითხებში, ამიტომაც იყო მათ შორის ურთიერთობა დაძაბული. არსებობს არაერთი მტკიცებულება, რომ ტარას შავშიშვილი დაინტერესებული იყო სხვადასხვა სტატიის გამოქვეყნებით, მათ შორის, “სნოს” წყალის შესახებ სტატია მის მიერ არის მომზადებული, მან გადასცა ჟურნალისტს, თუმცა ამასთან დაკავშირებით პროცესზე შავშიშვილმა იცრუა”,– განაცხადა პროკურორმა.