აქციაზე იარაღით მისვლის გამო, „ევროპული საქართველოს“ წევრის, დეპუტატ ოთარ კახიძის მიმართ სანქციაზე თბილისის საქალაქო სასამართლო დღეს იმსჯელებს.
პროცესი 13:40 საათზეა ჩანიშნული. ოთარ კახიძე სიტყვიერ გაფრთხილებას მიიღებს ან 500 ლარის ოდენობით დაჯარიმდება.
„პალიტრავიდეოს” მიერ გავრცელებულ მასალებში ჩანს, რომ 23 ივლისს „ევროპული საქართველოს” მიერ ორგანიზებულ აქციაზე ოთარ კახიძე იარაღით გადაადგილდებოდა. შესაბამისად, დეპუტატმა დაარღვია შეკრებისა და მანიფესტაციის შესახებ კანონი მე-11-ე მუხლის მეორე პუნქტი. აღნიშნული კანონის თანახმად, შეკრების ან მანიფესტაციის მონაწილეებს ეკრძალებათ იქონიონ ცეცხლსასროლი იარაღი, ფეთქებადი, ადვილად აალებადი, რადიოაქტიური ნივთები, ან ცივი იარაღი.
მომხდარ ფაქტთან დაკავშირებით შსს-ს ძველი თბილისის სამმართველოში გამოძიება ადმინისტრაციული სამართალდარღვევის კოდექსით 174-ე პრიმა მუხლისა და 239-ე მუხლის 12-ე პუნქტის შესაბამისად დაიწყო.
ოთარ კახიძე კანონის დარღვევას არ უარყოფს.