ავღანეთის სოფლის მეურნეობის, ირიგაციისა და მეცხოველეობის სამინისტროს დელეგაცია მოლდოვას ეწვია. „თალიბანის“ მთავრობის წარმომადგენელთა ვიზიტი 3 აგვისტოს მოლდოვის საგარეო საქმეთა სამინისტრომ დაადასტურა.
უწყების განცხადებით, დელეგაციის წევრები საერთაშორისო სანქციების ქვეშ არ იმყოფებიან და ოფიციალური შეხვედრები არ იგეგმება; მხარეები მხოლოდ ავღანეთისთვის ჰუმანიტარული დახმარების მიწოდების საკითხებს განიხილავენ.
ამავდროულად, „თალიბანის“ მიერ კონტროლირებადი ავღანური მედია იუწყება, რომ ვიზიტის მიზანი აგრარული ინოვაციების, მავნებლებთან ბრძოლისა და თანამედროვე აგროტექნოლოგიების სფეროში თანამშრომლობის განხილვაა.
მოლდოვის საგარეო საქმეთა სამინისტრომ ქვეყანაში „თალიბანის“ დელეგაციის ვიზიტის შესახებ გავრცელებულ ცნობებზე განმარტება გააკეთა. უწყებაში დაადასტურეს, რომ დელეგაციის წევრებზე ვიზები გაიცა. ვიზიტი მას შემდეგ შედგა, რაც ადგილობრივმა აგრომწარმოებლებმა და სოფლის მეურნეობის სამინისტროს წარმომადგენლებმა სურსათის უსაფრთხოების კრიზისში მყოფი ავღანეთისთვის ჰუმანიტარული დახმარების გაწევის შესაძლებლობები განიხილეს.
ამასთან, საგარეო უწყების ცნობით, დელეგაციის წევრები საერთაშორისო სანქციების ქვეშ არ იმყოფებიან, ხოლო მოლდოვა თალიბების მთავრობას არ ცნობს.
„გვსურს განვაცხადოთ, რომ დელეგაციის წარმომადგენლებთან არანაირი ორმხრივი შეხვედრები ან ოფიციალური კონტაქტები არ შედგება. მთავრობის განკარგულებით, უკვე დაიწყო მოწვევებისა და ვიზების გაცემის წესისა და შიდა პროცედურების შემოწმება“, – აღნიშნულია სამინისტროს განცხადებაში.