ჩატარებული ექსპერტიზით დადგინდა, რომ იუმორისტ დავით როსტომაშვილის დაყაჩაღების ფაქტზე დაკავებული ზ.ქუთელია თავდამსხმელებთან ერთად ავტომობილში არ მჯდარა. ამის შესახებ “პირველს” ქუთელიას ინტერესების დამცველმა განუცხადა.
ადვოკატ ალექსანდრე კობაიძის ინფორმაციით, სამხარაულის სახელობის ეროვნული ექსპერტიზის ბიუროდან მოსული პასუხით დასტურდება, რომ ზ. ქუთელია, დავით როსტომაშვილის ცემის მომენტამდე, რეალურ თავდამსხმელებთან ერთად, ავტომობილში არ მჯდარა, რადგან იქ არ აღმოჩნდა მისი დაცვის ქვეშ მყოფის დნმ-ი და სუნი.
“ახლა ველოდებით ჰაბიტოსკოპიური ექსპერტიზის პასუხს, რომელიც პიროვნებების სახის იდენტიფიცირებას მოახდენს. ამჯერადაც, დარწმუნებული ვარ, რომ პასუხი ჩვენს სასარგებლოდ მოვა და საბოლოოდ დამტკიცდება, რომ ზ. ქუთელიას დავით როსტომაშვილის ცემაში მონაწილეობა არ მიუღია”,- განუცხადა “პირველს” ბრალდებულის ინტერესების დამცველმა.
5 ივლისს, “პირველთან” საუბარში ალექსანდრე კობაიძემ აღნიშნა, რომ იუმორისტ დავით როსტომაშვილის დაყაჩაღების ფაქტზე უდანაშაულო ადამიანია დაკავებული, შესაბამისად, როდესაც სასამართლო დაადგენს, რომ როსტომაშვილმა ცრუ ჩვენება მისცა, მას პასუხისგებაში მისცემენ.
ადვოკატის ინფორმაციით, საქმეში არსებობს ვიდეოჩანაწერები, სადაც ჩანს, რომ მისი დაცვის ქვეშ მყოფი, როსტომაშვილზე თავდასხმის დროს, საკუთარი ავტომობილით, გოგოსთან ერთად გადაადგილდებოდა, სავარაუდო ბრალდებულები კი სხვა ავტომობილით გადაადგილდებოდნენ.
ადვოკატი იმასაც აცხადებს, რომ საქმეზე დანიშნულია ჰაბიტოსკოპიური ექსპერტიზა, რომელიც რეალური დამნაშავის იდენტიფიცირებას მოახდენს.
“ვინც დანაშაული ჩაიდინა, ის ადამიანები დაკავებულები არ არიან. ერთ-ერთი ბრალდებული, რომელიც დააკავეს, წინასწარი მოთავსების იზოლატორიდან გაექცათ. შემდგომ იჭერენ ჩემს დაცვის ქვეშ მყოფ ზ. ქუთელიას, რომელიც მხოლოდ და მხოლოდ იმიტომ არის დაკავებული, რომ მიმდებარე ტერიტორიაზე გადაადგილდებოდა. სათვალთავალო კამერებში ნათლად ჩანს, რომ ჩემი დაცვის ქვეშ მყოფის მანქანა იმ ტერიტორიაზე მოძრაობდა, რადგან ის იქ ცხოვრობდა. მთავარი მოწმე, რომლის მანქანითაც სავარაუდო დამნაშავეები როსტომაშვილზე თავდასასხმელად მივიდნენ, ამბობს, რომ ზ. ქუთელია მის მანქანაში არ მჯდარა. მოწმე ამბობს, რომ იმ ადამიანების ამოცნობა შეუძლია, რომლებიც მის ავტომობილში იმყოფებოდნენ”,- აცხადებს ადვოკატი.
ალექსანდრე კობაიძის ინფორმაციით, ქუთელიას დაკავება გვიან ღამით, საკუთარ საცხოვრებელ სახლში მოხდა, ის ბრალდებული კი, რომელიც სამართალდამცველებს გაექცათ, ცხელ კვალზევე დააკავეს.
ალექსანდრე კობაიძის ინფორმაციით, საქმეში დაცვის მხარეს ოქროს მოწმე ჰყავს.
“საუბარია გოგოზე, რომელიც მოცემულ მომენტში ქუთელიასთან ერთად ავტომობილში იმყოფებოდა. კადრებიდან ჩანს, რომ ქუთელიამ ხალხმრავალ ადგილთან მანქანა გააჩერა, როგორც სხვა ავტომობილის მძღოლებმა, რადგან ენახა რა ხდებოდა. ერთი მტკიცებულებაც კი არ არის, გარდა იმისა, რომ დაზარალებული როსტომაშვილი ქუთელიას ადანაშაულებს. პროკურატურა ახლა ჩიხშია, რადგან თუ ქუთელიას გაათავისუფლებს, როსტომაშვილი ცრუ ჩვენებისთვის უნდა მისცეს პასუხისგებაში. თავიდანვე არასწორად არის დაწყებული გამოძიება, თუმცა ვიმედოვნებ, რომ მალე ყველაფერი გაირკვევა. ბრალდება ამ ბოლო დროს მიხვდა, რომ ქუთელია დამნაშავე არ არის და პოზიციები შეარბილა”,- განაცხადა ალექსანდრე კობაიძე “პირველთან” საუბარში.
შინაგან საქმეთა სამინისტროს მიერ 23 ივნისს გავრცელებული ინფორმაციის თანახმად, 14 ივნისს შსს-ს თბილისის პოლიციის დეპარტამენტის ისანი-სამგორის სამმართველოს მე-3 განყოფილებაში დაიწყო გამოძიება მოქალაქე დავით როსტომაშვილის დაყაჩაღების ფაქტზე, საქართველოს სსკ-ს 179-ე მუხლით.
პოლიციამ ცხელ კვალზე დააკავა 1992 წელს დაბადებული ბ.კ., რომელიც დროებითი მოთავსების იზოლატორში გადაიყვანეს. იზოლატორში შესახლებამდე, ბადრაგირების დროს, ბ.კ.-მ გაქცევა და მიმალვა შეძლო. მას ბრალი დაუსწრებლად წარედგინა და იგი იძებნება საქართველოს სსკ-ს 179-ე მუხლის მე-2 ნაწილით.
აღნიშნულ ფაქტთან დაკავშირებით თბილისის პროკურატურაში გამოძიება სამსახურებრივი გულგრილობის ფაქტზე დაიწყო. პოლიციის სამ თანამშრომელს ბრალი წარედგინა საქართველოს სსკ-ს 342-ე მუხლის 1-ლი ნაწილით. 2017 წლის 23 ივნისს თბილისის საქალაქო სასამართლოს მიერ აღნიშნულ პირებს აღმკვეთი ღონისძიების სახით შეეფარდათ გირაო. სასამართლომ მათ ასევე შეუჩერა უფლებამოსილება.
ამავე ყაჩაღობის ფაქტზე, ბრალდებულის სახით, პოლიციამ 1991 წელს დაბადებული ზურაბ ქ. დააკავა, რომელიც დაზარალებულმა დავით როსტომაშვილმა და მისმა ქალიშვილმა, ქეთევან როსტომაშვილმა ამოიცნეს, როგორც ზემოხსენებული დანაშაულის ჩამდენი პირი”, – ნათქვამია საქართველოს შინაგან საქმეთა სამინისტროს განცხადებაში.
“პირველს” შინაგან საქმეთა სამინისტროდან აცნობეს, რომ წინასწარი დაკავების იზოლატორიდან გაქცეული ბრალდებულის სამძებრო სამუშაოები აქტიურად მიმდინარეობს.